dil bebas hai jab chaho tum qaid karo aazad karo

dil bebas hai jab chāho tum qaid karo āzād karo

sab kuchh tum par chhoḌ diyā hai rakkho yā barbād karo

aap ke gul haiñ aap kā gulshan aap yahāñ majbūr nahīñ

kaliyoñ kī āñkhoñ meñ jhāñko phūloñ ke dil shaad karo

sab kahte haiñ aap hamāre maiḳhāne ke saaqī haiñ

tishna-laboñ ke haq meñ baḌh kar ab to kuchh irshād karo

mausam badlā kaliyāñ mil kar giit milan ke gaatī haiñ

ab to qaid-e-tanhā.ī se dil ko mire āzād karo

hijr ke shikve tanhā.ī ke ḳhauf kī bāteñ rahne do

jo din mil kar saath guzāre haiñ vo bhī to yaad karo

yā duniyā meñ ghul-mil jaao yā duniyā se duur raho

TūTe-phūTe dil se naġhme chheḌo aur fariyād karo

sab kahte haiñ aap ke dar se faiz kā chashma jaarī hai

maiñ bhī to dil haar chukā huuñ merī bhī imdād karo

'zaidī' kaliyoñ kī bebākī se ab kyoñ ghabrāte ho

kitne shoḳh aur chanchal the tum apne din bhī yaad karo

dil bebas hai jab chaho tum qaid karo aazad karo

sab kuchh tum par chhoD diya hai rakkho ya barbaad karo

aap ke gul hain aap ka gulshan aap yahan majbur nahin

kaliyon ki aankhon mein jhanko phulon ke dil shad karo

sab kahte hain aap hamare maiKHane ke saqi hain

tishna-labon ke haq mein baDh kar ab to kuchh irshad karo

mausam badla kaliyan mil kar git milan ke gati hain

ab to qaid-e-tanhai se dil ko mere aazad karo

hijr ke shikwe tanhai ke KHauf ki baaten rahne do

jo din mil kar sath guzare hain wo bhi to yaad karo

ya duniya mein ghul-mil jao ya duniya se dur raho

TuTe-phuTe dil se naghme chheDo aur fariyaad karo

sab kahte hain aap ke dar se faiz ka chashma jari hai

main bhi to dil haar chuka hun meri bhi imdad karo

'zaidi' kaliyon ki bebaki se ab kyon ghabraate ho

kitne shoKH aur chanchal the tum apne din bhi yaad karo