dil bichhaD kar jo chala us but-e-maghrur talak

dil bichhaḌ kar jo chalā us but-e-maġhrūr talak

dekhtā maiñ bhī gayā us ke ta.iiñ duur talak

jaan jaave ki na jaave rahe sar yā na rahe

chhoḌne ke nahīñ ham tujh ko to maqdūr talak

ab nahīñ vaqt taġhāful kā sun ai yār-e-azīz

pahuñchiyo jald zarā is dil-e-ranjūr talak

ham bhī tab tak haiñ ki yaañ jalva hai jab tak terā

hastī-e-sāya bhī sach pūchho to hai nuur talak

zaḳhm-e-dil ishq ke ghar kā to dar-e-daulat hai

bhej marham ko na hamdam mire nāsūr talak

qāsid-o-nāma-o-paiġhām kī mat kah ki sabā

ab to vaañ se nahīñ aatī dil-e-mahjūr talak

mar ga.e din hī ko ham hijr meñ sad-shukr 'hasan'

kaam pahuñchā na hamārā shab-e-dījūr talak

dil bichhaD kar jo chala us but-e-maghrur talak

dekhta main bhi gaya us ke tain dur talak

jaan jawe ki na jawe rahe sar ya na rahe

chhoDne ke nahin hum tujh ko to maqdur talak

ab nahin waqt taghaful ka sun ai yar-e-aziz

pahunchiyo jald zara is dil-e-ranjur talak

hum bhi tab tak hain ki yan jalwa hai jab tak tera

hasti-e-saya bhi sach puchho to hai nur talak

zaKHm-e-dil ishq ke ghar ka to dar-e-daulat hai

bhej marham ko na hamdam mere nasur talak

qasid-o-nama-o-paigham ki mat kah ki saba

ab to wan se nahin aati dil-e-mahjur talak

mar gae din hi ko hum hijr mein sad-shukr 'hasan'

kaam pahuncha na hamara shab-e-dijur talak