dil chura le gai duzdida-nazar dekh liya

dil churā le ga.ī duzdīda-nazar dekh liyā

ham na kahte the ki us chor ne ghar dekh liyā

banda-parvar ġham-e-furqat kā asar dekh liyā

dāġh-e-dil dekh liyā dāġh-e-jigar dekh liyā

qad bhī kam umr bhī kam mashq-e-sitam aur bhī kam

kar chuke qatl mujhe jā.iye ghar dekh liyā

shikve ke saath lagāvaT bhī chalī jaatī hai

jab kiyā kuchh to kanakhiyoñ se idhar dekh liyā

dād-ḳhvāhoñ pe na.ī hashr meñ aafat aa.ī

saf kī saf loT ga.ī us ne jidhar dekh liyā

qatl-e-ushshāq pe lo aur uThāo ḳhanjar

jhuk ga.ī bār-e-nazākat se kamar dekh liyā

na chhuTā tum se ye mai-ḳhāne kā rasta 'beḳhud'

muñh chhupā.e hue jaate ho kidhar dekh liyā

dil chura le gai duzdida-nazar dekh liya

hum na kahte the ki us chor ne ghar dekh liya

banda-parwar gham-e-furqat ka asar dekh liya

dagh-e-dil dekh liya dagh-e-jigar dekh liya

qad bhi kam umr bhi kam mashq-e-sitam aur bhi kam

kar chuke qatl mujhe jaiye ghar dekh liya

shikwe ke sath lagawaT bhi chali jati hai

jab kiya kuchh to kanakhiyon se idhar dekh liya

dad-KHwahon pe nai hashr mein aafat aai

saf ki saf loT gai us ne jidhar dekh liya

qatl-e-ushshaq pe lo aur uThao KHanjar

jhuk gai bar-e-nazakat se kamar dekh liya

na chhuTa tum se ye mai-KHane ka rasta 'beKHud'

munh chhupae hue jate ho kidhar dekh liya