dil-e-aina-saman para para kar ke dekha jae

dil-e-ā.īna-sāmāñ paara paara kar ke dekhā jaa.e

sitāroñ ko kabhī mahv-e-nazāra kar ke dekhā jaa.e

kabhī tā-der shabnam taḳht-e-gul par bhī nahīñ rahtī

amīr-e-shahr ko itnā ishāra kar ke dekhā jaa.e

chamaktā hai sar-e-mizhgān-e-nam jo TuuT kar dil se

chalo us ashk-e-ḳhūnī ko sitāra kar ke dekhā jaa.e

harī kāñToñ-bharī beleñ mirī sāñsoñ se lipTī haiñ

aziyyat hī sahī kuchh din guzāra kar ke dekhā jaa.e

kahāñ fursat farishtoñ sī ki ham ye dard-e-sar moleñ

hisāb-e-dostāñ ko goshvāra kar ke dekhā jaa.e

hameñ dil jītne kā fan to aatā hai magar sochā

kabhī aisā bhī ho apnā ḳhasāra kar ke dekhā jaa.e

na jaane kitne aalam haiñ 'mujībī' ek aalam meñ

agar duniyā ko duniyā se kināra kar ke dekhā jaa.e

dil-e-aina-saman para para kar ke dekha jae

sitaron ko kabhi mahw-e-nazara kar ke dekha jae

kabhi ta-der shabnam taKHt-e-gul par bhi nahin rahti

amir-e-shahr ko itna ishaara kar ke dekha jae

chamakta hai sar-e-mizhgan-e-nam jo TuT kar dil se

chalo us ashk-e-KHuni ko sitara kar ke dekha jae

hari kanTon-bhari belen meri sanson se lipTi hain

aziyyat hi sahi kuchh din guzara kar ke dekha jae

kahan fursat farishton si ki hum ye dard-e-sar molen

hisab-e-dostan ko goshwara kar ke dekha jae

hamein dil jitne ka fan to aata hai magar socha

kabhi aisa bhi ho apna KHasara kar ke dekha jae

na jaane kitne aalam hain 'mujibi' ek aalam mein

agar duniya ko duniya se kinara kar ke dekha jae