دل عاشق میں داغ ہے کس کا

دل عاشق میں داغ ہے کس کا

کعبے میں یہ چراغ ہے کس کا

دل پڑا داغ باغ ہے کس کا

چشم پر خوں ایاغ ہے کس کا

میں نے مانا کہ وہ نہیں بے مہر

آسماں پر دماغ ہے کس کا

کوچۂ غیر سے تمہیں کیا کام

کون تھا یہ سراغ ہے کس کا

کر کے چورنگ مجھ کو ناز سے وہ

کہتے ہیں چار باغ ہے کس کا

اس بت بد دماغ کا ہے جہاں

وہ بت بد دماغ ہے کس کا

داغ دل جل رہا ہے بے روغن

یہ طلسمی چراغ ہے کس کا

سانپ سونگھے جو سونگھ لے زلفیں

کس کی طاقت دماغ ہے کس کا

سوز ہجراں سے داغ داغ ہے کون

آج دل باغ باغ ہے کس کا

کس کا بندہ بنا ہے اے واعظ

تیرے ماتھے پہ داغ ہے کس کا

شعر راسخؔ وہ سن کے کہتے ہیں

دل یہ کس کا دماغ ہے کس کا