dil-e-azada-rau mein wo tamanna thi bayaban ki

dil-e-āzāda-rau meñ vo tamannā thī bayābāñ kī

qadam rakhte hī shaq hone lagī dīvār zindāñ kī

ḳhudā kī rahmateñ ai mutrib-e-rañgīñ-navā tujh par

ki har kāñTe meñ tū ne ruuh dauḌā dī gulistāñ kī

ye sābit kar diyā tujh ko banā kar dast-e-qudrat ne

ki ho saktī haiñ itnī ḳhūbiyāñ sūrat meñ insāñ kī

nasīm-e-sub.h ThanDī saañs bhartī hai mazāroñ par

udāsī muñh-añdhere dekhiye gor-e-ġharībāñ kī

ye aalam kyā hai ik majmūa hai nāchīz zarroñ kā

ye duniyā kyā hai ik tarkīb ajzā-e-pareshāñ kī

havāoñ ke vo jhoñke vo khule maidān kī sardī

vo lahreñ chāñd se ruḳhsār par zulf-e-pareshāñ kī

hamārī zindagī kyā silsila ik dil dhaḌakne kā

hamārī maut kyā jumbish hai ik jazbāt-e-pinhāñ kī

banā deñgī yaqīñ hai 'josh' mard-e-bā-ḳhudā ik din

tapish-andoziyāñ siine meñ barq-e-soz-e-pinhāñ kī

dil-e-azada-rau mein wo tamanna thi bayaban ki

qadam rakhte hi shaq hone lagi diwar zindan ki

KHuda ki rahmaten ai mutrib-e-rangin-nawa tujh par

ki har kanTe mein tu ne ruh dauDa di gulistan ki

ye sabit kar diya tujh ko bana kar dast-e-qudrat ne

ki ho sakti hain itni KHubiyan surat mein insan ki

nasim-e-subh ThanDi sans bharti hai mazaron par

udasi munh-andhere dekhiye gor-e-ghariban ki

ye aalam kya hai ek majmua hai nachiz zarron ka

ye duniya kya hai ek tarkib ajza-e-pareshan ki

hawaon ke wo jhonke wo khule maidan ki sardi

wo lahren chand se ruKHsar par zulf-e-pareshan ki

hamari zindagi kya silsila ek dil dhaDakne ka

hamari maut kya jumbish hai ek jazbaat-e-pinhan ki

bana dengi yaqin hai 'josh' mard-e-ba-KHuda ek din

tapish-andoziyan sine mein barq-e-soz-e-pinhan ki