dil-e-be-tab ko kab wasl ka yara hota

dil-e-be-tāb ko kab vasl kā yaarā hotā

shādī-e-daulat-e-dīdār ne maarā hotā

shab-e-ġham zahr hī khāne kā maza thā varna

intizār-e-sahar-e-vasl ne maarā hotā

shab-e-hijrāñ kī balā Taale nahīñ Taltī hai

bhor kar dete agar zor hamārā hotā

aa.ī jis shaan se madfan meñ savārī merī

dekhte ġhair to marnā hī gavārā hotā

kyuuñ na siine se lagī rahtī amānat terī

dāġh-e-dil kyuuñ na hameñ jaan se pyārā hotā

sar jhukā.e tirī ummīd pe baiThe haiñ ham

qātil is baar amānat ko utārā hotā

ek ho jaatī abhī kāfir-o-dīñ-dār kī raah

agar un juTTī bhuvoñ kā ik ishārā hotā

bhīgtī jaatī hai raat aur abhī sohbat hai garm

jaam lab-rez isī aalam meñ hamārā hotā

nigah-e-lutf se mahrūm huuñ ab tak saaqī

saf-e-āḳhir kī taraf bhī ik ishārā hotā

duur se sāġhar-o-mīnā ko khaḌā taktā huuñ

dil koī rakhtā to mujh ko bhī pukārā hotā

duur itnī na kabhī khiñchtī adam kī manzil

kaash kuchh naqsh-e-qadam hī kā sahārā hotā

yaas ab aap kahāñ aur kahāñ bāñg-e-jaras

kaun is vādī-e-ġhurbat meñ tumhārā hotā

dekhte rah ga.e 'yās' aap ne achchhā na kiyā

Dūbte vaqt kisī ko to pukārā hotā

sūrat-e-zāhirī ik parda-e-tārīk thī 'yās'

husn-e-ma.anī kā kan-āñkhiyoñ se nazāra hotā

dil-e-be-tab ko kab wasl ka yara hota

shadi-e-daulat-e-didar ne mara hota

shab-e-gham zahr hi khane ka maza tha warna

intizar-e-sahar-e-wasl ne mara hota

shab-e-hijran ki bala Tale nahin Talti hai

bhor kar dete agar zor hamara hota

aai jis shan se madfan mein sawari meri

dekhte ghair to marna hi gawara hota

kyun na sine se lagi rahti amanat teri

dagh-e-dil kyun na hamein jaan se pyara hota

sar jhukae teri ummid pe baiThe hain hum

qatil is bar amanat ko utara hota

ek ho jati abhi kafir-o-din-dar ki rah

agar un juTTi bhuwon ka ek ishaara hota

bhigti jati hai raat aur abhi sohbat hai garm

jam lab-rez isi aalam mein hamara hota

nigah-e-lutf se mahrum hun ab tak saqi

saf-e-aKHir ki taraf bhi ek ishaara hota

dur se saghar-o-mina ko khaDa takta hun

dil koi rakhta to mujh ko bhi pukara hota

dur itni na kabhi khinchti adam ki manzil

kash kuchh naqsh-e-qadam hi ka sahaara hota

yas ab aap kahan aur kahan bang-e-jaras

kaun is wadi-e-ghurbat mein tumhaara hota

dekhte rah gae 'yas' aap ne achchha na kiya

Dubte waqt kisi ko to pukara hota

surat-e-zahiri ek parda-e-tarik thi 'yas'

husn-e-mani ka kan-ankhiyon se nazara hota