dil-e-bedar faruqi dil-e-bedar karrari

dil-e-bedār fārūqī dil-e-bedār karrārī

mis-e-ādam ke haq meñ kīmiyā hai dil kī bedārī

dil-e-bedār paidā kar ki dil ḳhvābīda hai jab tak

na terī zarb hai kaarī na merī zarb hai kaarī

mashām-e-tez se miltā hai sahrā meñ nishāñ us kā

zan o taḳhmīñ se haath aatā nahīñ āhū-e-tātārī

is andeshe se zabt-e-āh maiñ kartā rahūñ kab tak

ki muġh-zāde na le jaa.eñ tirī qismat kī chingārī

ḳhudāvandā ye tere sāda-dil bande kidhar jaa.eñ

ki darveshī bhī ayyārī hai sultānī bhī ayyārī

mujhe tahzīb-e-hāzir ne atā kī hai vo āzādī

ki zāhir meñ to āzādī hai bātin meñ giraftārī

tū ai maulā-e-yasrib aap merī chārasāzī kar

mirī dānish hai afrañgī mirā īmāñ hai zunnārī

dil-e-bedar faruqi dil-e-bedar karrari

mis-e-adam ke haq mein kimiya hai dil ki bedari

dil-e-bedar paida kar ki dil KHwabida hai jab tak

na teri zarb hai kari na meri zarb hai kari

masham-e-tez se milta hai sahra mein nishan us ka

zan o taKHmin se hath aata nahin aahu-e-tatari

is andeshe se zabt-e-ah main karta rahun kab tak

ki mugh-zade na le jaen teri qismat ki chingari

KHudawanda ye tere sada-dil bande kidhar jaen

ki darweshi bhi ayyari hai sultani bhi ayyari

mujhe tahzib-e-hazir ne ata ki hai wo aazadi

ki zahir mein to aazadi hai baatin mein giraftari

tu ai maula-e-yasrib aap meri chaarasazi kar

meri danish hai afrangi mera iman hai zunnari