dil-e-muztar ko samjha lun bahut hai

dil-e-muztar ko samjhā luuñ bahut hai

maiñ ḳhud se apnā ghar chhālūñ bahut hai

maiñ apnī zindgī-e-bevafā ko

vafā ke jaam meñ Dhālūñ bahut hai

bhigo kar āñsuoñ se apnā chehra

safar kī gard dho Dālūñ bahut hai

sukūt-e-anjuman TuuTe na TuuTe

ba-shauq-e-zamzama gā luuñ bahut hai

navāh-e-zindagī meñ ik zarā sā

fareb-e-dostī khā luuñ bahut hai

koī bhūlā sabaq pārīna qissa

maiñ dil hī dil meñ dohrā luuñ bahut hai

na jaa.e rā.egāñ zauq-e-tajassus

maiñ apne aap ko pā luuñ bahut hai

jo sañg-e-mīl rahzan ke liye hai

vo sañg-e-rāh uThvā luuñ bahut hai

'sabā' dīvār-e-zindān-e-balā se

maiñ apne sar ko Takrā luuñ bahut hai

dil-e-muztar ko samjha lun bahut hai

main KHud se apna ghar chhaalun bahut hai

main apni zindgi-e-bewafa ko

wafa ke jam mein Dhaalun bahut hai

bhigo kar aansuon se apna chehra

safar ki gard dho Dalun bahut hai

sukut-e-anjuman TuTe na TuTe

ba-shauq-e-zamzama ga lun bahut hai

nawah-e-zindagi mein ek zara sa

fareb-e-dosti kha lun bahut hai

koi bhula sabaq parina qissa

main dil hi dil mein dohra lun bahut hai

na jae raegan zauq-e-tajassus

main apne aap ko pa lun bahut hai

jo sang-e-mil rahzan ke liye hai

wo sang-e-rah uThwa lun bahut hai

'saba' diwar-e-zindan-e-bala se

main apne sar ko Takra lun bahut hai