dil gaya dil ka nishan baqi raha

dil gayā dil kā nishāñ baaqī rahā

dil kī jā dard-e-nihāñ baaqī rahā

kaun zer-e-āsmāñ baaqī rahā

nek-nāmoñ kā nishāñ baaqī rahā

ho liye duniyā ke puure kārobār

aur ik ḳhvāb-e-girāñ baaqī rahā

rafta rafta chal base dil ke makīñ

ab faqat ḳhālī makāñ baaqī rahā

chal diye sab chhoḌ kar ahl-e-jahāñ

aur rahne ko jahāñ baaqī rahā

kārvāñ manzil pe pahuñchā umr kā

ab ġhubār-e-kārvāñ baaqī rahā

mil ga.e miTTī meñ kyā kyā mah-jabīñ

sab ko khā kar āsmāñ baaqī rahā

miT ga.e ban ban ke kyā qasr o mahal

naam ko ik lā-makāñ baaqī rahā

aarzū hī aarzū meñ miT ga.e

aur shauq-e-āstāñ baaqī rahā

aish o ishrat chal base dil se 'zahīr'

dard o ġham bahr-e-nishāñ baaqī rahā

dil gaya dil ka nishan baqi raha

dil ki ja dard-e-nihan baqi raha

kaun zer-e-asman baqi raha

nek-namon ka nishan baqi raha

ho liye duniya ke pure karobar

aur ek KHwab-e-giran baqi raha

rafta rafta chal base dil ke makin

ab faqat KHali makan baqi raha

chal diye sab chhoD kar ahl-e-jahan

aur rahne ko jahan baqi raha

karwan manzil pe pahuncha umr ka

ab ghubar-e-karwan baqi raha

mil gae miTTi mein kya kya mah-jabin

sab ko kha kar aasman baqi raha

miT gae ban ban ke kya qasr o mahal

nam ko ek la-makan baqi raha

aarzu hi aarzu mein miT gae

aur shauq-e-astan baqi raha

aish o ishrat chal base dil se 'zahir'

dard o gham bahr-e-nishan baqi raha