dil hai masarrat-e-gham-e-jaanan liye hue

dil hai masarrat-e-ġham-e-jānāñ liye hue

lekin malāl-e-talḳhī-e-daurāñ liye hue

ai dil na ho udaas ḳhudārā na ho udaas

ehsās-e-tishna-kāmī-e-armāñ liye hue

har mushkil-e-hayāt hai ḳhud apnī aaḌ meñ

āsānī-e-hayāt kā sāmāñ liye hue

har kam-nazar ko de ke zamāne kī rāhateñ

maiñ ḳhush huuñ apnā qalb-e-pareshāñ liye hue

ai rahravān-e-sāhil-e-ummīd hoshiyār

sāhil hai apnī god meñ tūfāñ liye hue

ai dost apne aap pe nāzāñ rahā huuñ maiñ

ik azm-e-sar-bulandī-e-insāñ liye hue

ummīd-e-iltifāt pe baiThā huuñ mutma.in

sarmāya-e-nadāmat-e-isyāñ liye hue

us anjuman meñ jā to rahā huuñ magar 'atīq'

dil meñ kashākash-e-ġham-e-daurāñ liye hue

dil hai masarrat-e-gham-e-jaanan liye hue

lekin malal-e-talKHi-e-dauran liye hue

ai dil na ho udas KHudara na ho udas

ehsas-e-tishna-kaami-e-arman liye hue

har mushkil-e-hayat hai KHud apni aaD mein

aasani-e-hayat ka saman liye hue

har kam-nazar ko de ke zamane ki rahaten

main KHush hun apna qalb-e-pareshan liye hue

ai rahrawan-e-sahil-e-ummid hoshiyar

sahil hai apni god mein tufan liye hue

ai dost apne aap pe nazan raha hun main

ek azm-e-sar-bulandi-e-insan liye hue

ummid-e-iltifat pe baiTha hun mutmain

sarmaya-e-nadamat-e-isyan liye hue

us anjuman mein ja to raha hun magar 'atiq'

dil mein kashakash-e-gham-e-dauran liye hue