dil hai mushtaq juda aankh talabgar juda

dil hai mushtāq judā aañkh talabgār judā

ḳhvāhish-e-vasl judā hasrat-e-dīdār judā

zāhidoñ se na banī hashr ke din bhī yā-rab

vo khaḌe haiñ tirī rahmat ke talabgār judā

jī jalāne ko satāne ko miTāne ko mujhe

vo judā ġhair judā charḳh-e-sitam-gār judā

bijliyāñ hazrat-e-mūsā pe girīñ do ik baar

shola-e-shauq judā shola-e-dīdār judā

ho ga.e vo sahar-e-vasl ye kah kar ruḳhsat

tujh se kartā hai mujhe charḳh-e-sitamgār judā

qatl karte hī mujhe jalva-numā.ī bhī huī

dar pe hañgāma alag hai pas-e-dīvār judā

zāhidoñ kī tirī rahmat pe chaḌhā.ī hai alag

Toliyāñ bāñdh kar aa.e haiñ gunahgār judā

vaz.a kā paas bhī hai 'beḳhud'-e-mai-ḳhvār zarūr

kaag botal se na kījiye sar-e-bāzār judā

dil hai mushtaq juda aankh talabgar juda

KHwahish-e-wasl juda hasrat-e-didar juda

zahidon se na bani hashr ke din bhi ya-rab

wo khaDe hain teri rahmat ke talabgar juda

ji jalane ko satane ko miTane ko mujhe

wo juda ghair juda charKH-e-sitam-gar juda

bijliyan hazrat-e-musa pe girin do ek bar

shola-e-shauq juda shola-e-didar juda

ho gae wo sahar-e-wasl ye kah kar ruKHsat

tujh se karta hai mujhe charKH-e-sitamgar juda

qatl karte hi mujhe jalwa-numai bhi hui

dar pe hangama alag hai pas-e-diwar juda

zahidon ki teri rahmat pe chaDhai hai alag

Toliyan bandh kar aae hain gunahgar juda

waza ka pas bhi hai 'beKHud'-e-mai-KHwar zarur

kag botal se na kijiye sar-e-bazar juda