dil humne jo chashm-e-but-e-bebak se bandha

dil ham ne jo chashm-e-but-e-bebāk se bāñdhā

phir nashsha-e-sahbā se na tiryāk se bāñdhā

us zulf se jab rabt huā jī ko to ham ne

shāne kā tasavvur dil-e-sad-chāk se bāñdhā

dekhā na qad-e-sarv ko phir ham ne chaman meñ

jis din se dil us qāmat-e-chālāk se bāñdhā

jo āhū-e-dil bhā gayā us sad-fagan ko

jhap us ne use kākul-e-pechāk se bāñdhā

aur jo na pasand aayā use vo to 'nazīr' aah

ne said kiyā us ko na fitrāk se bāñdhā

dil hum ne jo chashm-e-but-e-bebak se bandha

phir nashsha-e-sahba se na tiryak se bandha

us zulf se jab rabt hua ji ko to hum ne

shane ka tasawwur dil-e-sad-chaak se bandha

dekha na qad-e-sarw ko phir hum ne chaman mein

jis din se dil us qamat-e-chaalak se bandha

jo aahu-e-dil bha gaya us sad-fagan ko

jhap us ne use kakul-e-pechaak se bandha

aur jo na pasand aaya use wo to 'nazir' aah

ne said kiya us ko na fitrak se bandha