dil hamara jaanib-e-zulf-e-siyah-fam aaega

dil hamārā jānib-e-zulf-e-siyah-fām aa.egā

ye musāfir aaj manzil par sar-e-shām aa.egā

go burā hai dil magar rahne diyā hai is liye

ishq kī ḳhūgar tabī.at hai kabhī kaam aa.egā

ishq-e-dil kāmil nahīñ dekho abhī kholo na zulf

said jab shahbāz hai kyūñkar na tah-e-dām aa.egā

qāsid-e-marg aa.e yā aa.e tumhārā nāma-bar

kah rahā hai dil ki koī aaj paiġhām aa.egā

jaam ġhota kar ke kausar se mañgā.ī hai sharāb

mujh ko farmāte haiñ vo pāband-e-islām aa.egā

nek nāmoñ kā ho majma.a bazm ho ārāsta

aap ḳhush hoñ yā ḳhafā hoñ ek badnām aa.egā

tum nahā lo jald varna rashk se mar jā.ūñgā

dam meñ ab saaya sar-e-dīvār-e-hammām aa.egā

donoñ āñkheñ dil-jigar haiñ ishq hone meñ sharīk

ye to sab achchhe raheñge mujh par ilzām aa.egā

tark kar do shā.irī ko aql rakhte ho 'rashīd'

ho chuke ho piir ab kyā tum ko ye kaam aa.egā

dil hamara jaanib-e-zulf-e-siyah-fam aaega

ye musafir aaj manzil par sar-e-sham aaega

go bura hai dil magar rahne diya hai is liye

ishq ki KHugar tabiat hai kabhi kaam aaega

ishq-e-dil kaamil nahin dekho abhi kholo na zulf

said jab shahbaz hai kyunkar na tah-e-dam aaega

qasid-e-marg aae ya aae tumhaara nama-bar

kah raha hai dil ki koi aaj paigham aaega

jam ghota kar ke kausar se mangai hai sharab

mujh ko farmate hain wo paband-e-islam aaega

nek namon ka ho majma bazm ho aarasta

aap KHush hon ya KHafa hon ek badnam aaega

tum naha lo jald warna rashk se mar jaunga

dam mein ab saya sar-e-diwar-e-hammam aaega

donon aankhen dil-jigar hain ishq hone mein sharik

ye to sab achchhe rahenge mujh par ilzam aaega

tark kar do shairi ko aql rakhte ho 'rashid'

ho chuke ho pir ab kya tum ko ye kaam aaega