dil hi dil mein ghuT ke rah jaun ye meri KHu nahin

dil hī dil meñ ghuT ke rah jā.ūñ ye merī ḳhū nahīñ

aaj ai āshob-e-daurāñ maiñ nahīñ yā tū nahīñ

sañg kī sūrat paḌā huuñ vaqt kī dahlīz par

Thokaroñ meñ zindagī hai aañkh meñ aañsū nahīñ

shab ġhanīmat thī ki raushan the ummīdoñ ke ḳhutūt

din ke sahrā meñ koī taarā koī jugnū nahīñ

chaar jānib ye saje chehre haiñ yā kāġhaz ke phuul

rañg ke jalve to haiñ lekin kahīñ ḳhushbū nahīñ

terī rahmat kā nahīñ har chand maiñ munkir magar

sar pe jo chaḌh kar na bole vo koī jaadū nahīñ

maslahat hai jin kā maslak vo mire bhaa.ī kahāñ

jo na uTTheñ mere dushman par mire baazū nahīñ

dil hi dil mein ghuT ke rah jaun ye meri KHu nahin

aaj ai aashob-e-dauran main nahin ya tu nahin

sang ki surat paDa hun waqt ki dahliz par

Thokaron mein zindagi hai aankh mein aansu nahin

shab ghanimat thi ki raushan the ummidon ke KHutut

din ke sahra mein koi tara koi jugnu nahin

chaar jaanib ye saje chehre hain ya kaghaz ke phul

rang ke jalwe to hain lekin kahin KHushbu nahin

teri rahmat ka nahin har chand main munkir magar

sar pe jo chaDh kar na bole wo koi jadu nahin

maslahat hai jin ka maslak wo mere bhai kahan

jo na uTThen mere dushman par mere bazu nahin