dil ho KHarab din pe jo kuchh asar paDe

dil ho ḳharāb diin pe jo kuchh asar paḌe

ab kār-e-āshiqī to bahar-kaif kar paḌe

ishq-e-butāñ kā diin pe jo kuchh asar paḌe

ab to nibāhnā hai jab ik kaam kar paḌe

maz.hab chhuḌāyā ishva-e-duniyā ne shaiḳh se

dekhī jo rail uuñT se āḳhir utar paḌe

betābiyāñ nasīb na thiiñ varna ham-nashīñ

ye kyā zarūr thā ki unhīñ par nazar paḌe

behtar yahī hai qasd udhar kā kareñ na vo

aisā na ho ki raah meñ dushman kā ghar paḌe

ham chāhte haiñ mel vajūd-o-adam meñ ho

mumkin to hai jo beach meñ un kī kamar paḌe

daanā vahī hai dil jo kare aap kā ḳhayāl

biinā vahī nazar hai ki jo aap par paḌe

honī na chāhiye thī mohabbat magar huī

paḌnā na chāhiye thā ġhazab meñ magar paḌe

shaitān kī na maan jo rāhat-nasīb ho

allāh ko pukār musībat agar paḌe

ai shaiḳh un butoñ kī ye chālākiyāñ to dekh

nikle agar haram se to 'akbar' ke ghar paḌe

dil ho KHarab din pe jo kuchh asar paDe

ab kar-e-ashiqi to bahar-kaif kar paDe

ishq-e-butan ka din pe jo kuchh asar paDe

ab to nibahna hai jab ek kaam kar paDe

mazhab chhuDaya ishwa-e-duniya ne shaiKH se

dekhi jo rail unT se aaKHir utar paDe

betabiyan nasib na thin warna ham-nashin

ye kya zarur tha ki unhin par nazar paDe

behtar yahi hai qasd udhar ka karen na wo

aisa na ho ki rah mein dushman ka ghar paDe

hum chahte hain mel wajud-o-adam mein ho

mumkin to hai jo beach mein un ki kamar paDe

dana wahi hai dil jo kare aap ka KHayal

bina wahi nazar hai ki jo aap par paDe

honi na chahiye thi mohabbat magar hui

paDna na chahiye tha ghazab mein magar paDe

shaitan ki na man jo rahat-nasib ho

allah ko pukar musibat agar paDe

ai shaiKH un buton ki ye chaalakiyan to dekh

nikle agar haram se to 'akbar' ke ghar paDe