dil hota hai taskin ke aalam mein hazin aur

dil hotā hai taskīn ke aalam meñ hazīñ aur

le chal mujhe ai shauq-e-subuk-gām kahīñ aur

haañ aur uThā parde ko ai parda-nashīñ aur

mujh sā nahīñ koī tire jalvoñ kā amiiñ aur

jitnī vo mire haal pe karte haiñ jafā.eñ

aatā hai mujhe un kī mohabbat kā yaqīñ aur

mai-ḳhāne kī hai shaan usī shor-e-talab se

haañ aur nahīñ par hai taqāzā ki nahīñ aur

hai hāsil-e-sad-zīst javānī kā ye aalam

ai umr-e-gurezāñ mujhe rahne de yahīñ aur

mujh sā jo nahīñ aur koī chāhne vaalā

tujh sā bhī zamāne meñ nahīñ koī hasīñ aur

kaafī nahīñ mujh ko ye nigāh-e-ġhalat-andāz

haañ aur baḌhā hausla-e-qalb-e-hazīñ aur

takrār kā ai shaiḳh yahī to hai natīja

tum ne jo kahīñ aur to ham se bhī sunīñ aur

ham martaba-e-'arsh' koī un meñ na hogā

hoñge dar-e-jānāñ ke bahut ḳhāk-nashīñ aur

dil hota hai taskin ke aalam mein hazin aur

le chal mujhe ai shauq-e-subuk-gam kahin aur

han aur uTha parde ko ai parda-nashin aur

mujh sa nahin koi tere jalwon ka amin aur

jitni wo mere haal pe karte hain jafaen

aata hai mujhe un ki mohabbat ka yaqin aur

mai-KHane ki hai shan usi shor-e-talab se

han aur nahin par hai taqaza ki nahin aur

hai hasil-e-sad-zist jawani ka ye aalam

ai umr-e-gurezan mujhe rahne de yahin aur

mujh sa jo nahin aur koi chahne wala

tujh sa bhi zamane mein nahin koi hasin aur

kafi nahin mujh ko ye nigah-e-ghalat-andaz

han aur baDha hausla-e-qalb-e-hazin aur

takrar ka ai shaiKH yahi to hai natija

tum ne jo kahin aur to hum se bhi sunin aur

hum martaba-e-'arsh' koi un mein na hoga

honge dar-e-jaanan ke bahut KHak-nashin aur