dil jins-e-mohabbat ka KHaridar nahin hai

dil jins-e-mohabbat kā ḳharīdār nahīñ hai

pahlī sī vo ab sūrat-bāzār nahīñ hai

har baar vahī soch vahī zahr kā sāġhar

is par ye sitam jur.at-e-inkār nahīñ hai

kuchh uTh ke bagūloñ kī tarah ho ga.e raqsāñ

kuchh kahte rahe rāsta hamvār nahīñ hai

dil Duub gayā lazzat-e-āġhosh-e-sahar meñ

bedār hai is tarah ki bedār nahīñ hai

ham is se matā-e-dil-o-jāñ maañg rahe haiñ

jo ek tabassum kā ravādār nahīñ hai

ye sar se nikaltī huī logoñ kī fasīleñ

dil se magar ūñchī koī dīvār nahīñ hai

dam saadh ke baiThā huuñ agarche mire sar par

ik shāḳh-e-samar-dār hai talvār nahīñ hai

dam lo na kahīñ dhuup meñ chalte raho 'bāqī'

apne liye ye sāya-e-ashjār nahīñ hai

dil jins-e-mohabbat ka KHaridar nahin hai

pahli si wo ab surat-bazar nahin hai

har bar wahi soch wahi zahr ka saghar

is par ye sitam jurat-e-inkar nahin hai

kuchh uTh ke bagulon ki tarah ho gae raqsan

kuchh kahte rahe rasta hamwar nahin hai

dil Dub gaya lazzat-e-aghosh-e-sahar mein

bedar hai is tarah ki bedar nahin hai

hum is se mata-e-dil-o-jaan mang rahe hain

jo ek tabassum ka rawadar nahin hai

ye sar se nikalti hui logon ki fasilen

dil se magar unchi koi diwar nahin hai

dam sadh ke baiTha hun agarche mere sar par

ek shaKH-e-samar-dar hai talwar nahin hai

dam lo na kahin dhup mein chalte raho 'baqi'

apne liye ye saya-e-ashjar nahin hai