dil jo sine mein zar sa hai kuchh

dil jo siine meñ zaar sā hai kuchh

ġham se be-iḳhtiyār sā hai kuchh

raḳht-e-hastī badan pe Thiik nahīñ

jāma-e-musta.ār sā hai kuchh

chashm-e-nargis kahāñ vo chashm kahāñ

nashsha kaisā ḳhumār sā hai kuchh

naḳhl-e-ummīd meñ na phuul na phal

shajar-e-be-bahār sā hai kuchh

sāqiyā hijr meñ ye abr nahīñ

āsmāñ par ġhubār sā hai kuchh

kal to aafat thī dil kī betābī

aaj bhī be-qarār sā hai kuchh

murda hai dil to gor hai siina

daaġh sham-e-mazār sā hai kuchh

is ko duniyā kī us ko ḳhuld kī hirs

rind hai kuchh na pārsā hai kuchh

pahle is se thā hoshiyār 'amīr'

ab to be-iḳhtiyār sā hai kuchh

dil jo sine mein zar sa hai kuchh

gham se be-iKHtiyar sa hai kuchh

raKHt-e-hasti badan pe Thik nahin

jama-e-mustaar sa hai kuchh

chashm-e-nargis kahan wo chashm kahan

nashsha kaisa KHumar sa hai kuchh

naKHl-e-ummid mein na phul na phal

shajar-e-be-bahaar sa hai kuchh

saqiya hijr mein ye abr nahin

aasman par ghubar sa hai kuchh

kal to aafat thi dil ki betabi

aaj bhi be-qarar sa hai kuchh

murda hai dil to gor hai sina

dagh sham-e-mazar sa hai kuchh

is ko duniya ki us ko KHuld ki hirs

rind hai kuchh na parsa hai kuchh

pahle is se tha hoshiyar 'amir'

ab to be-iKHtiyar sa hai kuchh