dil ka safar bas ek hi manzil pe bas nahin

dil kā safar bas ek hī manzil pe bas nahīñ

itnā ḳhayāl us kā hameñ is baras nahīñ

dekho gul-e-ahār-e-asar dasht-e-shām meñ

dīvār-o-dar koī bhī kahīñ pesh-o-pas nahīñ

aayā nahīñ yaqīn bahut der tak hameñ

apne hī ghar kā dar hai ye bāb-e-qafas nahīñ

aisā safar hai jis kī koī intihā nahīñ

aisā makāñ hai jis meñ koī ham-nafas nahīñ

aa.egī phir bahār isī shahr meñ 'munīr'

taqdīr is nagar kī faqat ḳhār-o-ḳhas nahīñ

dil ka safar bas ek hi manzil pe bas nahin

itna KHayal us ka hamein is baras nahin

dekho gul-e-ahaar-e-asar dasht-e-sham mein

diwar-o-dar koi bhi kahin pesh-o-pas nahin

aaya nahin yaqin bahut der tak hamein

apne hi ghar ka dar hai ye bab-e-qafas nahin

aisa safar hai jis ki koi intiha nahin

aisa makan hai jis mein koi ham-nafas nahin

aaegi phir bahaar isi shahr mein 'munir'

taqdir is nagar ki faqat KHar-o-KHas nahin