dil ka sukun aankh ka tara kise kahen

dil kā sukūn aañkh kā taarā kise kaheñ

ye sochnā paḌā hai ki apnā kise kaheñ

ye shor-e-inqalāb ye nāqūs ye azaañ

hañgāma kaun sā hai tamāsha kise kaheñ

rahbāniyat kā jism se fastā.iyat kī ruuh

kis ko rafīq ḳhuun kā pyāsā kise kaheñ

sab milte-julte chehre haiñ dushman bhī dost bhī

qātil kise batā.eñ masīhā kise kaheñ

har zarra-e-haqīr hai ham-dosh mehr-o-māh

is pattharoñ ke Dher meñ hiirā kise kaheñ

itnā shu.ūr de hameñ ḳhallāq ḳhair-o-shar

ḳhār-o-zabūñ hai kaun farishta kise kaheñ

milnā thā jo nasīb se vo mil gayā 'ziyā'

hasrat kise batā.eñ tamannā kise kaheñ

dil ka sukun aankh ka tara kise kahen

ye sochna paDa hai ki apna kise kahen

ye shor-e-inqalab ye naqus ye azan

hangama kaun sa hai tamasha kise kahen

rahbaniyat ka jism se fastaiyat ki ruh

kis ko rafiq KHun ka pyasa kise kahen

sab milte-julte chehre hain dushman bhi dost bhi

qatil kise bataen masiha kise kahen

har zarra-e-haqir hai ham-dosh mehr-o-mah

is pattharon ke Dher mein hira kise kahen

itna shuur de hamein KHallaq KHair-o-shar

KHar-o-zabun hai kaun farishta kise kahen

milna tha jo nasib se wo mil gaya 'ziya'

hasrat kise bataen tamanna kise kahen