dil ke hote bhi kahin dard juda hota hai

dil ke hote bhī kahīñ dard judā hotā hai

ik faqat maut ke aa jaane se kyā hotā hai

zulm se zikr-e-vafā aur sivā hotā hai

un kī har ek burā.ī meñ bhalā hotā hai

shohdā ne.mat-e-duniyā kī talab bhuul ga.e

ḳhuun ke ghūñT meñ aisā hī mazā hotā hai

ḳhud-farāmoshī-e-ulfat hai ilāj-e-ġham-e-dahr

be-ḳhabar hosh meñ aanā hī burā hotā hai

imtihāñ-gāh tirī mahfil-e-dilkash hai magar

maiñ bhī dekhūñ ki koī dil ke sivā hotā hai

tum se kahtā huuñ mirā ḳhuun mire dil pe sahī

rasm-e-duniyā hai ki apnoñ se gilā hotā hai

bazm se uTh to chalā maiñ ki mahal thā lekin

rone vāloñ se bhalā koī ḳhafā hotā hai

dekh hī lete haiñ sab nāz-o-adā kī sūrat

aa.ina aap kā naqsh-e-kaf-e-pā hotā hai

nāla-e-dil ke asar kā na karo mujh se gila

mujh ko kyā ilm ki kis tarah rasā hotā hai

tauba tauba hai yahī ishq kī bātil nazarī

sañg but-ḳhāne meñ aate hī ḳhudā hotā hai

kyā sabab kuchh tujhe ma.alūm hai ai abr-e-bahār

dil ke murjhāne se kyuuñ zaḳhm harā hotā hai

vo kaheñ yā na kaheñ maiñ huuñ asar se vāqif

bol uThtā hai vo naala jo rasā hotā hai

raushnī din kī abhī hai ki haiñ kho.e hue hosh

dekhnā hai shab-e-tārīk meñ kyā hotā hai

hijr ke dard ko baḌhne de ki hai muzhda-e-vasl

vahī ghaTtā hai jahāñ meñ jo sivā hotā hai

bad-nasībī ho to har ḳhuub kī ḳhūbī hai fuzūl

sub.h kā vaqt sitāroñ ko burā hotā hai

dil to dil sar bhī kabhī hotā hai mamnūn-e-firāq

jis meñ hai ishq ye saudā vo judā hotā hai

mire raazī ba-razā hone se sab raazī haiñ

varna jo hai vo shikāyat se ḳhafā hotā hai

avvalīñ marhala-e-ishq hai jab hasrat-o-maut

koī batlā.e ki phir ba.ad meñ kyā hotā hai

bīm-o-ummīd se kis tarah nikal jā.ūñ ki dil

na Thahartā hai jahāñ meñ na fanā hotā hai

muntazir naza.a meñ chup hai to use chup na samajh

dam kā ruk ruk ke nikalnā bhī gilā hotā hai

shab-e-tārīk meñ niklā to hai dekhūñ 'sāqib'

nā-rasā rahtā hai naala ki rasā hotā hai

dil ke hote bhi kahin dard juda hota hai

ek faqat maut ke aa jaane se kya hota hai

zulm se zikr-e-wafa aur siwa hota hai

un ki har ek burai mein bhala hota hai

shohda nemat-e-duniya ki talab bhul gae

KHun ke ghunT mein aisa hi maza hota hai

KHud-faramoshi-e-ulfat hai ilaj-e-gham-e-dahr

be-KHabar hosh mein aana hi bura hota hai

imtihan-gah teri mahfil-e-dilkash hai magar

main bhi dekhun ki koi dil ke siwa hota hai

tum se kahta hun mera KHun mere dil pe sahi

rasm-e-duniya hai ki apnon se gila hota hai

bazm se uTh to chala main ki mahal tha lekin

rone walon se bhala koi KHafa hota hai

dekh hi lete hain sab naz-o-ada ki surat

aaina aap ka naqsh-e-kaf-e-pa hota hai

nala-e-dil ke asar ka na karo mujh se gila

mujh ko kya ilm ki kis tarah rasa hota hai

tauba tauba hai yahi ishq ki baatil nazari

sang but-KHane mein aate hi KHuda hota hai

kya sabab kuchh tujhe malum hai ai abr-e-bahaar

dil ke murjhane se kyun zaKHm hara hota hai

wo kahen ya na kahen main hun asar se waqif

bol uThta hai wo nala jo rasa hota hai

raushni din ki abhi hai ki hain khoe hue hosh

dekhna hai shab-e-tarik mein kya hota hai

hijr ke dard ko baDhne de ki hai muzhda-e-wasl

wahi ghaTta hai jahan mein jo siwa hota hai

bad-nasibi ho to har KHub ki KHubi hai fuzul

subh ka waqt sitaron ko bura hota hai

dil to dil sar bhi kabhi hota hai mamnun-e-firaq

jis mein hai ishq ye sauda wo juda hota hai

mere raazi ba-raza hone se sab raazi hain

warna jo hai wo shikayat se KHafa hota hai

awwalin marhala-e-ishq hai jab hasrat-o-maut

koi batlae ki phir baad mein kya hota hai

bim-o-ummid se kis tarah nikal jaun ki dil

na Thaharta hai jahan mein na fana hota hai

muntazir naza mein chup hai to use chup na samajh

dam ka ruk ruk ke nikalna bhi gila hota hai

shab-e-tarik mein nikla to hai dekhun 'saqib'

na-rasa rahta hai nala ki rasa hota hai