dil ki aawaz pe baiat bhi to ho sakti hai

dil kī āvāz pe bai.at bhī to ho saktī hai

tum agar chāho mohabbat bhī to ho saktī hai

maiñ jise samjhā huuñ āvāra havā kī dastak

tere aane kī bashārat bhī to ho saktī hai

zindagī tere tasavvur se hī mashrūt nahīñ

terī yādoñ se halākat bhī to ho saktī hai

āḳhirī baar tujhe dekhnā hasrat hī nahīñ

marne vaale kī zarūrat bhī to ho saktī hai

kab zarūrī hai ki ham qais kī sunnat pe chaleñ

maz.hab-e-ishq meñ bid.at bhī to ho saktī hai

is liye dekhtā rahtā huuñ musalsal tujh ko

aañkh mahrūm-e-basārat bhī to ho saktī hai

lafz sheroñ meñ jo Dhalte nahīñ 'tahsīn' mire

soch ke rizq meñ qillat bhī to ho saktī hai

dil ki aawaz pe baiat bhi to ho sakti hai

tum agar chaho mohabbat bhi to ho sakti hai

main jise samjha hun aawara hawa ki dastak

tere aane ki bashaarat bhi to ho sakti hai

zindagi tere tasawwur se hi mashrut nahin

teri yaadon se halakat bhi to ho sakti hai

aaKHiri bar tujhe dekhna hasrat hi nahin

marne wale ki zarurat bhi to ho sakti hai

kab zaruri hai ki hum qais ki sunnat pe chalen

mazhab-e-ishq mein bidat bhi to ho sakti hai

is liye dekhta rahta hun musalsal tujh ko

aankh mahrum-e-basarat bhi to ho sakti hai

lafz sheron mein jo Dhalte nahin 'tahsin' mere

soch ke rizq mein qillat bhi to ho sakti hai