dil ki bisat pe shah pyaade kitni bar utaroge

dil kī bisāt pe shaah payāde kitnī baar utāroge

is bastī meñ sab shātir haiñ tum har baazī hāroge

prem-pujārī mandir mandir dil kī kathā kyuuñ gaate ho

but saare patthar haiñ pyāre sar patthar se māroge

dil meñ khīñch ke us kī sūrat aaj to ḳhush ḳhush aa.e ho

kal se us meñ rañg bharoge kal se naqsh ubhāroge

saare din to us kī galī meñ aate jaate guzrī hai

ab bolo ab raat huī hai kaise raat guzāroge

pyaar kī āñkheñ muñd jā.eñgī dil kā diyā bujh jā.egā

kab tak lahū jalāo.ge tum kab tak kājal pāroge

jis ko daatā maan ke tum ne bhiik lagan kī māñgī hai

us ne bhī jo salām kiyā to dāman kahāñ pasāroge

'bāqar' sāhab mahā kavī ho baḌe gurū kahlāte ho

apnā dukh-sukh bhuul ga.e to kis kā ḳhaal sañvāroge

kalī kalī ashkoñ kī laḌiyāñ phuul phuul ye komal giit

kis kī sej sajā.ī 'bāqar' kis kā ruup nikhāroge

dil ki bisat pe shah payaade kitni bar utaroge

is basti mein sab shatir hain tum har bazi haaroge

prem-pujari mandir mandir dil ki katha kyun gate ho

but sare patthar hain pyare sar patthar se maroge

dil mein khinch ke us ki surat aaj to KHush KHush aae ho

kal se us mein rang bharoge kal se naqsh ubhaaroge

sare din to us ki gali mein aate jate guzri hai

ab bolo ab raat hui hai kaise raat guzaroge

pyar ki aankhen mund jaengi dil ka diya bujh jaega

kab tak lahu jalaoge tum kab tak kajal paroge

jis ko data man ke tum ne bhik lagan ki mangi hai

us ne bhi jo salam kiya to daman kahan pasaroge

'baqar' sahab maha kawi ho baDe guru kahlate ho

apna dukh-sukh bhul gae to kis ka KHal sanwaroge

kali kali ashkon ki laDiyan phul phul ye komal git

kis ki sej sajai 'baqar' kis ka rup nikhaaroge