dil ki diwana tabiat ko musibat na bana

dil kī dīvāna tabī.at ko musībat na banā

tujh se yārāna hai yārāna mohabbat na banā

maiñ tujhe dil kī sunātā huuñ mujhe tū dil kī

is suhūlat ko mirī jaan aziyyat na banā

ham ko le de ke ta.alluq hī bachā hai terā

is ko mashkūk na kar bā.is-e-tohmat na banā

ek dīvār ne rishtoñ kā taqaddus toḌā

bhaa.ī rokā thā tujhe ghar meñ ye la.anat na banā

niiñd ko taaq pe dhar aur diyā pahlū meñ

girya-e-āḳhir-e-shab meñ koī diqqat na banā

beTiyāñ rizq meñ barakat kā sabab hotī haiñ

ghar kī rahmat ko ġhalat soch se zahmat na banā

aks kā honā hai mashrūt tire hone se

ḳhud ko pahchān magar aks ko hairat na banā

hū-ba-hū us kī adāoñ kī adā lāzim hai

yaar kī sunnat-e-mas.ūd ko bid.at na banā

iḳhtilāfāt haiñ insān kā ḳhāsa 'tahsīn'

bahs karnī hai to kar bahs ko nafrat na banā

dil ki diwana tabiat ko musibat na bana

tujh se yarana hai yarana mohabbat na bana

main tujhe dil ki sunata hun mujhe tu dil ki

is suhulat ko meri jaan aziyyat na bana

hum ko le de ke talluq hi bacha hai tera

is ko mashkuk na kar bais-e-tohmat na bana

ek diwar ne rishton ka taqaddus toDa

bhai roka tha tujhe ghar mein ye lanat na bana

nind ko taq pe dhar aur diya pahlu mein

girya-e-aKHir-e-shab mein koi diqqat na bana

beTiyan rizq mein barakat ka sabab hoti hain

ghar ki rahmat ko ghalat soch se zahmat na bana

aks ka hona hai mashrut tere hone se

KHud ko pahchan magar aks ko hairat na bana

hu-ba-hu us ki adaon ki ada lazim hai

yar ki sunnat-e-masud ko bidat na bana

iKHtilafat hain insan ka KHasa 'tahsin'

bahs karni hai to kar bahs ko nafrat na bana