dil ki kaya gham ne wo palTi ki tujh sa ban gaya

dil kī kaayā ġham ne vo palTī ki tujh sā ban gayā

dard meñ dil Duub kar qatre se dariyā ban gayā

un ke āġhosh-e-mashiyyat meñ hai nākāmī mirī

kaam kuchh is tarah bigḌā hai ki goyā ban gayā

dil kī rut aisī to yād-e-yār ne badlī na thī

ye chaman ujḌā hī is Dhab se ki sahrā ban gayā

naqsh-e-mauhūm-e-hayāt afsāna-dar-afsāna thā

jab ye naqsh ubhrā to ik harf-e-tamannā ban gayā

lo mubārak lazzat-e-ġham bhī hai ab to nāgavār

dil mohabbat meñ jo banñā chāhiye thā ban gayā

jalva-e-kasrat ḳhud apnā shauq-e-be-andāza thā

mahfil-e-lailā mirī nazroñ meñ lailā ban gayā

merī mahrūmī bhī rusvā hai ki 'fānī' hāl-e-dil

un ke kānoñ tak na pahuñchā aur fasānā ban gayā

dil ki kaya gham ne wo palTi ki tujh sa ban gaya

dard mein dil Dub kar qatre se dariya ban gaya

un ke aaghosh-e-mashiyyat mein hai nakaami meri

kaam kuchh is tarah bigDa hai ki goya ban gaya

dil ki rut aisi to yaad-e-yar ne badli na thi

ye chaman ujDa hi is Dhab se ki sahra ban gaya

naqsh-e-mauhum-e-hayat afsana-dar-afsana tha

jab ye naqsh ubhra to ek harf-e-tamanna ban gaya

lo mubarak lazzat-e-gham bhi hai ab to nagawar

dil mohabbat mein jo banna chahiye tha ban gaya

jalwa-e-kasrat KHud apna shauq-e-be-andaza tha

mahfil-e-laila meri nazron mein laila ban gaya

meri mahrumi bhi ruswa hai ki 'fani' haal-e-dil

un ke kanon tak na pahuncha aur fasana ban gaya