dil ki lagi ye usne bujhai tamam raat

dil kī lagī ye us ne bujhā.ī tamām raat

ik aag par ik aag lagā.ī tamām raat

vo aur nāz-e-husn ke andāz-e-be-panāh

maiñ aur dard-e-dil kī duhā.ī tamām raat

is sharmgīñ nigāh kī allāh rī hayā

bhūle se bhī nazar na uThā.ī tamām raat

aane kā vā'da kar ke bhī aaya na hā.e-hā.e

ik bevafā ne raah dikhā.ī tamām raat

vo shahryār-e-husn thā aur merī chashm-e-shauq

dekhā kiyā ḳhudā kī ḳhudā.ī tamām raat

badla hai ye shikastan-e-sāġhar kā mohtasib

TuuTā jo terā zuhd-e-riyā.ī tamām raat

vo mere paas hī rahā goyā shab-e-firāq

taḳh.īl kī vo sham' jalā.ī tamām raat

jab baḳht so rahā ho koī so.e kis tarah

bedār-e-ġham ko niiñd na aa.ī tamām raat

ik baar mujh ko dekh ke sharmā gayā jo vo

nazroñ se phir nazar na milā.ī tamām raat

tere ḳhayāl meñ maiñ barābar jagā kiyā

āñkhoñ kī niiñd dil ne uḌaa.ī tamām raat

vo be-niyāz is pe bhī raazī na ho sakā

dil ne jabīn-e-'ijz jhukā.ī tamām raat

vā'de kī shab na aanā thā hargiz na aaya vo

aa.ī to us kī yaad hī aa.ī tamām raat

maiñ us nigāh-e-mast kā maḳhmūr huuñ 'junūñ'

be-jām-o-shīsha jis ne pilā.ī tamām raat

dil ki lagi ye us ne bujhai tamam raat

ek aag par ek aag lagai tamam raat

wo aur naz-e-husn ke andaz-e-be-panah

main aur dard-e-dil ki duhai tamam raat

is sharmgin nigah ki allah ri haya

bhule se bhi nazar na uThai tamam raat

aane ka wa'da kar ke bhi aaya na hae-hae

ek bewafa ne rah dikhai tamam raat

wo shahryar-e-husn tha aur meri chashm-e-shauq

dekha kiya KHuda ki KHudai tamam raat

badla hai ye shikastan-e-saghar ka mohtasib

TuTa jo tera zuhd-e-riyai tamam raat

wo mere pas hi raha goya shab-e-firaq

taKHil ki wo sham' jalai tamam raat

jab baKHt so raha ho koi soe kis tarah

bedar-e-gham ko nind na aai tamam raat

ek bar mujh ko dekh ke sharma gaya jo wo

nazron se phir nazar na milai tamam raat

tere KHayal mein main barabar jaga kiya

aankhon ki nind dil ne uDai tamam raat

wo be-niyaz is pe bhi raazi na ho saka

dil ne jabin-e-'ijz jhukai tamam raat

wa'de ki shab na aana tha hargiz na aaya wo

aai to us ki yaad hi aai tamam raat

main us nigah-e-mast ka maKHmur hun 'junun'

be-jam-o-shisha jis ne pilai tamam raat