dil ki manzil us taraf hai ghar ka rasta is taraf

dil kī manzil us taraf hai ghar kā rasta is taraf

ek chehra us taraf hai ek chehra is taraf

raushnī ke isti.āre us kināre rah ga.e

ab to shab meñ koī jugnū hai nā taarā is taraf

tum havā un khiḌkiyoñ se sirf itnā dekhnā

us ne koī ḳhat kisī ke naam likkhā is taraf

ye mohabbat bhī ajab taqsīm ke mausam meñ hai

saarā jazba is taraf hai sirf lahja is taraf

maañ ne koī ḳhauf aisā rakh diyā dil meñ mire

sach kabhī maiñ bol hī paa.ī na puurā is taraf

ek halkī sī chubhan ehsās ko ghere rahī

guftugū meñ jab tumhārā zikr aayā is taraf

sirf āñkheñ kāñch kī baaqī badan patthar kā hai

laḌkiyoñ ne kis tarah ruup dhārā is taraf

ai havā ai mere dil ke shahr se aatī havā

tujh ko kyā paiġhām de kar us ne bhejā is taraf

kis tarah ke log haiñ ye kuchh patā chaltā nahīñ

kaun kitnā us taraf hai kaun kitnā is taraf

dil ki manzil us taraf hai ghar ka rasta is taraf

ek chehra us taraf hai ek chehra is taraf

raushni ke istiare us kinare rah gae

ab to shab mein koi jugnu hai na tara is taraf

tum hawa un khiDkiyon se sirf itna dekhna

us ne koi KHat kisi ke nam likkha is taraf

ye mohabbat bhi ajab taqsim ke mausam mein hai

sara jazba is taraf hai sirf lahja is taraf

man ne koi KHauf aisa rakh diya dil mein mere

sach kabhi main bol hi pai na pura is taraf

ek halki si chubhan ehsas ko ghere rahi

guftugu mein jab tumhaara zikr aaya is taraf

sirf aankhen kanch ki baqi badan patthar ka hai

laDkiyon ne kis tarah rup dhaara is taraf

ai hawa ai mere dil ke shahr se aati hawa

tujh ko kya paigham de kar us ne bheja is taraf

kis tarah ke log hain ye kuchh pata chalta nahin

kaun kitna us taraf hai kaun kitna is taraf