dil ki parwaz hai la-makan tak

dil kī parvāz hai lā-makāñ tak

aql kī jast hai āsmāñ tak

barq taḌpī to aa.ī kahāñ tak

āshiyāñ bas mire āshiyāñ tak

dard kā silsila hai jahāñ tak

dil kī jāgīr hogī vahāñ tak

log kahte haiñ ab rah gayā hai

terā qissa mirī dāstāñ tak

aap rasman hī kyuuñ muskurā.e

dekhiye baat phailī kahāñ tak

shauq ke marhale bhī haiñ saare

sirf ehsās-e-sūd-o-ziyāñ tak

ham to hadd-e-yaqīñ se bhī guzre

aap kyuuñ rah ga.e haiñ gumāñ tak

ab jabīñ nañg-e-sajda nahīñ hai

kaun jaa.e tire āstāñ tak

maut aatī hai to aa.e 'tarzī'

baat dil kī na aa.e zabāñ tak

dil ki parwaz hai la-makan tak

aql ki jast hai aasman tak

barq taDpi to aai kahan tak

aashiyan bas mere aashiyan tak

dard ka silsila hai jahan tak

dil ki jagir hogi wahan tak

log kahte hain ab rah gaya hai

tera qissa meri dastan tak

aap rasman hi kyun muskurae

dekhiye baat phaili kahan tak

shauq ke marhale bhi hain sare

sirf ehsas-e-sud-o-ziyan tak

hum to hadd-e-yaqin se bhi guzre

aap kyun rah gae hain guman tak

ab jabin nang-e-sajda nahin hai

kaun jae tere aastan tak

maut aati hai to aae 'tarzi'

baat dil ki na aae zaban tak