dil ko aazar laga wo ki chhupa bhi na sakun

dil ko āzār lagā vo ki chhupā bhī na sakūñ

parda vo aa ke paḌā hai ki uThā bhī na sakūñ

mudda.ā sāmne un ke nahīñ aatā lab tak

baat bhī kyā ġham-e-dil hai ki sunā bhī na sakūñ

be-jagah aañkh laḌī dekhiye kyā hotā hai

aap jā bhī na sakūñ un ko bulā bhī na sakūñ

vo dam-e-naz.a mire bahar-ayādat aa.e

haal kab pūchhte haiñ jab ki sunā bhī na sakūñ

zindagī bhī shab-e-hijrāñ hai ki kaTtī hī nahīñ

maut hai kyā tirā aanā ki bulā bhī na sakūñ

dam hai āñkhoñ meñ ise jaan meñ lā.ūñ kyūñkar

kab vo aa.e ki unheñ haath lagā bhī na sakūñ

sharm-e-isyāñ ne jhukāyā mirī gardan ko 'zahīr'

bojh vo aa ke paḌā hai ki uThā bhī na sakūñ

dil ko aazar laga wo ki chhupa bhi na sakun

parda wo aa ke paDa hai ki uTha bhi na sakun

muddaa samne un ke nahin aata lab tak

baat bhi kya gham-e-dil hai ki suna bhi na sakun

be-jagah aankh laDi dekhiye kya hota hai

aap ja bhi na sakun un ko bula bhi na sakun

wo dam-e-naza mere bahar-ayaadat aae

haal kab puchhte hain jab ki suna bhi na sakun

zindagi bhi shab-e-hijran hai ki kaTti hi nahin

maut hai kya tera aana ki bula bhi na sakun

dam hai aankhon mein ise jaan mein laun kyunkar

kab wo aae ki unhen hath laga bhi na sakun

sharm-e-isyan ne jhukaya meri gardan ko 'zahir'

bojh wo aa ke paDa hai ki uTha bhi na sakun