dil ko afsos-e-jawani hai jawani ab kahan

dil ko afsos-e-javānī hai javānī ab kahāñ

koī dam meñ chal baseñge zindagānī ab kahāñ

aap ulaTre haiñ vo parda vo kahānī ab kahāñ

āshiqoñ se guftugū hai lan-tarānī ab kahāñ

jab hamāre paas the un ko hamārā paas thā

thī hamārī qadr jab thī qadr-dānī ab kahāñ

ai parī-paikar tirā mere hī dam tak thā banāv

surḳh mūbāf o libās-e-za.afrānī ab kahāñ

bad-mizājī naujavānī ne sikhā.ī hai unheñ

dushman-e-jāñ ho ga.e haiñ mehrbānī ab kahāñ

yaar aa niklā thā ai dil phir vo kyuuñ aane lagā

ho gayā ik ye bhī amr-e-nā-gahānī ab kahāñ

ba.ad mere phir kisī ne bhī sunī āvāz-e-yār

thī mujhī tak lan-tarānī lan-tarānī ab kahāñ

baaġh meñ nahreñ bharī haiñ phuul phal kā thā mazā

band haiñ kunj-e-qafas meñ dāna-pānī ab kahāñ

terī aur apnī haqīqat jā ke iisā se kahūñ

is qadar tāqat bhalā ai nā-tavānī ab kahāñ

shefta jab tak na the shohrat thī zabt-o-sabr kī

dard-e-tanhā.ī kī taab ai yār-e-jānī ab kahāñ

dil meñ tāqat thī taḌap lete the bismil kī tarah

jaan meñ hālat nahīñ vo jāñ-fishānī ab kahāñ

ghuur lete the jafā-kāroñ ko jab maftūñ na the

ho ga.e chaurañg ḳhud chañgez-ḳhānī ab kahāñ

apnī qudrat us ne dikhlā dī shab-e-me.arāj meñ

ho chukī bas mehmānī mehmānī ab kahāñ

lahlahāte the chaman maftūñ guloñ par the bahār

luT ga.ī bū-bās ai barg-e-ḳhizānī ab kahāñ

hāl-e-dil kahvāte the jab qāsid aate jaate the

nāma-e-shauq aur paiġhām-e-zabānī ab kahāñ

dāġh-e-dil us ne diyā thā dil ko ham ne kho diyā

ai 'sharaf' us be-muravvat kī nishānī ab kahāñ

dil ko afsos-e-jawani hai jawani ab kahan

koi dam mein chal basenge zindagani ab kahan

aap ulaTre hain wo parda wo kahani ab kahan

aashiqon se guftugu hai lan-tarani ab kahan

jab hamare pas the un ko hamara pas tha

thi hamari qadr jab thi qadr-dani ab kahan

ai pari-paikar tera mere hi dam tak tha banaw

surKH mubaf o libas-e-zafrani ab kahan

bad-mizaji naujawani ne sikhai hai unhen

dushman-e-jaan ho gae hain mehrbani ab kahan

yar aa nikla tha ai dil phir wo kyun aane laga

ho gaya ek ye bhi amr-e-na-gahani ab kahan

baad mere phir kisi ne bhi suni aawaz-e-yar

thi mujhi tak lan-tarani lan-tarani ab kahan

bagh mein nahren bhari hain phul phal ka tha maza

band hain kunj-e-qafas mein dana-pani ab kahan

teri aur apni haqiqat ja ke isa se kahun

is qadar taqat bhala ai na-tawani ab kahan

shefta jab tak na the shohrat thi zabt-o-sabr ki

dard-e-tanhai ki tab ai yar-e-jaani ab kahan

dil mein taqat thi taDap lete the bismil ki tarah

jaan mein haalat nahin wo jaan-fishani ab kahan

ghur lete the jafa-karon ko jab maftun na the

ho gae chaurang KHud changez-KHani ab kahan

apni qudrat us ne dikhla di shab-e-mearaj mein

ho chuki bas mehmani mehmani ab kahan

lahlahate the chaman maftun gulon par the bahaar

luT gai bu-bas ai barg-e-KHizani ab kahan

haal-e-dil kahwate the jab qasid aate jate the

nama-e-shauq aur paigham-e-zabani ab kahan

dagh-e-dil us ne diya tha dil ko hum ne kho diya

ai 'sharaf' us be-murawwat ki nishani ab kahan