dil ko ai ishq su-e-zulf-e-siyah-fam na bhej

dil ko ai ishq sū-e-zulf-e-siyah-fām na bhej

rahzanoñ meñ tū musāfir ko sar-e-shām na bhej

dekh ho jā.ūñgā ġhairoñ ke gale kā maiñ haar

haar phūloñ ke tū ai shoḳh-gul-andām na bhej

bhar nazar sūrat-e-gul dekh to leñ ai be-dard

haa.e sayyād abhī ham ko tah-e-dām na bhej

jab vo bheje hai mujhe mai to kaheñ haiñ yuuñ ġhair

ye bahak jā.egā bas aur ise jaam na bhej

bhejūñ us paas jo qāsid ko dobāra to kahe

baaz āyā, nahīñ lene kā maiñ in.aam na bhej

kūcha-e-yār meñ pahuñche haiñ to bas rahne de

jīte-jī yaañ se kahīñ gardish-e-ayyām na bhej

dam-ba-dam bheje hai quliyāñ hī ko kyā muñh se lagā

lab se bhī lab ko milā bosa-ba-paiġhām na bhej

ba.ad muddat ke tujhe paayā hai tanhā ba-ḳhudā

aaj tū kaam ko yaañ se but-e-ḳhud-kām na bhej

de kabhī bosa-e-chashm-o-lab-e-jāñ-baḳhsh bhī jaañ

sirf sauġhāt hameñ bosa-ba-paiġhām na bhej

gāliyāñ to haiñ mohabbat kī ibārat pyāre

kab maiñ kahtā huuñ ki likh kar mujhe dushnām na bhej

par ye dhaḌkā hai ki jaave na kahīñ ḳhat pakḌā

kar ke sar-nāme pe tahrīr mirā naam na bhej

'jur.at' ab tujh se vo rūThā to manā kyūñki maiñ lā.ūñ

tū hī phir dene lagegā mujhe ilzām na bhej

dil ko ai ishq su-e-zulf-e-siyah-fam na bhej

rahzanon mein tu musafir ko sar-e-sham na bhej

dekh ho jaunga ghairon ke gale ka main haar

haar phulon ke tu ai shoKH-gul-andam na bhej

bhar nazar surat-e-gul dekh to len ai be-dard

hae sayyaad abhi hum ko tah-e-dam na bhej

jab wo bheje hai mujhe mai to kahen hain yun ghair

ye bahak jaega bas aur ise jam na bhej

bhejun us pas jo qasid ko dobara to kahe

baz aaya, nahin lene ka main inam na bhej

kucha-e-yar mein pahunche hain to bas rahne de

jite-ji yan se kahin gardish-e-ayyam na bhej

dam-ba-dam bheje hai quliyan hi ko kya munh se laga

lab se bhi lab ko mila bosa-ba-paigham na bhej

baad muddat ke tujhe paya hai tanha ba-KHuda

aaj tu kaam ko yan se but-e-KHud-kaam na bhej

de kabhi bosa-e-chashm-o-lab-e-jaan-baKHsh bhi jaan

sirf saughat hamein bosa-ba-paigham na bhej

galiyan to hain mohabbat ki ibarat pyare

kab main kahta hun ki likh kar mujhe dushnam na bhej

par ye dhaDka hai ki jawe na kahin KHat pakDa

kar ke sar-name pe tahrir mera nam na bhej

'jurat' ab tujh se wo ruTha to mana kyunki main laun

tu hi phir dene lagega mujhe ilzam na bhej