dil ko dard-ashna kiya tu ne

dil ko dard-āshnā kiyā tū ne

dard-e-dil ko davā kiyā tū ne

tab-e-insāñ ko dī sirisht-e-vafā

ḳhaak ko kīmiyā kiyā tū ne

vasl-e-jānāñ muhāl Thahrāyā

qatl-e-āshiq ravā kiyā tū ne

thā na juz ġham bisāt-e-āshiq meñ

ġham ko rāhat-fazā kiyā tū ne

jaan thī ik vabāl furqat meñ

shauq ko jāñ-guzā kiyā tū ne

thī mohabbat meñ nañg minnat-e-ġhair

jazb-e-dil ko rasā kiyā tū ne

raah zāhid ko jab kahīñ na milī

dar-e-mai-ḳhāna vā kiyā tū ne

qat.a hone hī jab lagā paivand

ġhair ko āshnā kiyā tū ne

thī jahāñ kārvāñ ko denī raah

ishq ko rahnumā kiyā tū ne

naav bhar kar jahāñ Dubonī thī

aql ko nāḳhudā kiyā tū ne

baḌh ga.ī jab pidar ko mehr-e-pisar

us ko us se judā kiyā tū ne

jab huā mulk o maal rahzan-e-hosh

bādshah ko gadā kiyā tū ne

jab milī kām-e-jāñ ko lazzat-e-dard

dard ko be-davā kiyā tū ne

jab diyā rāh-rau ko zauq-e-talab

sa.ī ko nā-rasā kiyā tū ne

parda-e-chashm the hijāb bahut

husn ko ḳhud-numā kiyā tū ne

ishq ko tāb-e-intizār na thī

ġhurfa ik dil meñ vā kiyā tū ne

haram ābād aur dair ḳharāb

jo kiyā sab bajā kiyā tū ne

saḳht afsurda tab.a thī ahbāb

ham ko jaadū navā kiyā tū ne

phir jo dekhā to kuchh na thā yā rab

kaun pūchhe ki kyā kiyā tū ne

'hālī' uTThā hilā ke mahfil ko

āḳhir apnā kahā kiyā tū ne

dil ko dard-ashna kiya tu ne

dard-e-dil ko dawa kiya tu ne

tab-e-insan ko di sirisht-e-wafa

KHak ko kimiya kiya tu ne

wasl-e-jaanan muhaal Thahraya

qatl-e-ashiq rawa kiya tu ne

tha na juz gham bisat-e-ashiq mein

gham ko rahat-faza kiya tu ne

jaan thi ek wabaal furqat mein

shauq ko jaan-guza kiya tu ne

thi mohabbat mein nang minnat-e-ghair

jazb-e-dil ko rasa kiya tu ne

rah zahid ko jab kahin na mili

dar-e-mai-KHana wa kiya tu ne

qata hone hi jab laga paiwand

ghair ko aashna kiya tu ne

thi jahan karwan ko deni rah

ishq ko rahnuma kiya tu ne

naw bhar kar jahan Duboni thi

aql ko naKHuda kiya tu ne

baDh gai jab pidar ko mehr-e-pisar

us ko us se juda kiya tu ne

jab hua mulk o mal rahzan-e-hosh

baadshah ko gada kiya tu ne

jab mili kaam-e-jaan ko lazzat-e-dard

dard ko be-dawa kiya tu ne

jab diya rah-rau ko zauq-e-talab

sai ko na-rasa kiya tu ne

parda-e-chashm the hijab bahut

husn ko KHud-numa kiya tu ne

ishq ko tab-e-intizar na thi

ghurfa ek dil mein wa kiya tu ne

haram aabaad aur dair KHarab

jo kiya sab baja kiya tu ne

saKHt afsurda taba thi ahbab

hum ko jadu nawa kiya tu ne

phir jo dekha to kuchh na tha ya rab

kaun puchhe ki kya kiya tu ne

'haali' uTTha hila ke mahfil ko

aaKHir apna kaha kiya tu ne