dil ko harif-e-gardish-e-dauran kiye hue

dil ko harīf-e-gardish-e-daurāñ kiye hue

baiThā huā huuñ ziist kā sāmāñ kiye hue

ab mushkilāt-e-rāh-e-mohabbat kā zikr kyā

ik umr ho ga.ī inheñ āsāñ kiye hue

piitā huuñ roz piitā huuñ talḳhāba-e-umīd

ehsās-e-lutf-e-sāqī-e-daurāñ kiye hue

bahlā rahā huuñ dil ko fareb-e-ḳhayāl se

ummīd-e-ġham-gusārī-e-yārāñ kiye hue

but-ḳhāna-e-majāz se guzrā huuñ bārhā

ḳhuddārī-e-nigāh numāyāñ kiye hue

ab jā rahā huuñ jānib-e-mai-ḳhāna-e-muġhāñ

sad-ehtirām-e-hazrat-e-yazdāñ kiye hue

achchhā to aaj sair-e-ḳharābāt hī sahī

lekin ḳhayāl-e-talḳhī-e-daurāñ kiye hue

baiThe hue haiñ bāda-kashān-e-vafā ḳhamosh

ehsās-e-talḳh-kāmi-e-yārāñ kiye hue

dekho vo jā rahe haiñ harīfān-e-tez-gām

azm-e-tavāf-e-manzil-e-jānāñ kiye hue

ahbāb-e-ḳhush-mazāq kā ehsān hai ye 'rāz'

muddat huī thī dil ko ġhazal-ḳhvāñ kiye hue

dil ko harif-e-gardish-e-dauran kiye hue

baiTha hua hun zist ka saman kiye hue

ab mushkilat-e-rah-e-mohabbat ka zikr kya

ek umr ho gai inhen aasan kiye hue

pita hun roz pita hun talKHaba-e-umid

ehsas-e-lutf-e-saqi-e-dauran kiye hue

bahla raha hun dil ko fareb-e-KHayal se

ummid-e-gham-gusari-e-yaran kiye hue

but-KHana-e-majaz se guzra hun barha

KHuddari-e-nigah numayan kiye hue

ab ja raha hun jaanib-e-mai-KHana-e-mughan

sad-ehtiram-e-hazrat-e-yazdan kiye hue

achchha to aaj sair-e-KHarabaat hi sahi

lekin KHayal-e-talKHi-e-dauran kiye hue

baiThe hue hain baada-kashan-e-wafa KHamosh

ehsas-e-talKH-kaami-e-yaran kiye hue

dekho wo ja rahe hain harifan-e-tez-gam

azm-e-tawaf-e-manzil-e-jaanan kiye hue

ahbab-e-KHush-mazaq ka ehsan hai ye 'raaz'

muddat hui thi dil ko ghazal-KHwan kiye hue