dil ko harif-e-naz kiye ja raha hun main

dil ko harīf-e-nāz kiye jā rahā huuñ maiñ

har shai se be-niyāz kiye jā rahā huuñ maiñ

shukr-e-nigāh-e-nāz kiye jā rahā huuñ maiñ

fitrat ko kārsāz kiye jā rahā huuñ maiñ

hai justujū-e-sirr-e-haqīqat-ravāñ-faroz

rāh-e-talab darāz kiye jā rahā huuñ maiñ

duniyā ko de rahā huuñ sabaq husn-o-ishq kā

ifshā har ek raaz kiye jā rahā huuñ maiñ

hogā kabhī to husn-e-haqīqat nazar-navāz

nazzāra-e-majāz kiye jā rahā huuñ maiñ

nākāmī-e-umīd se ghabrā na jaa.e dil

qismat par apnī naaz kiye jā rahā huuñ maiñ

mahrūm rah na jaa.e koī tishna-kām 'rāz'

arzāñ sharāb-e-rāz kiye jā rahā huuñ maiñ

dil ko harif-e-naz kiye ja raha hun main

har shai se be-niyaz kiye ja raha hun main

shukr-e-nigah-e-naz kiye ja raha hun main

fitrat ko karsaz kiye ja raha hun main

hai justuju-e-sirr-e-haqiqat-rawan-faroz

rah-e-talab daraaz kiye ja raha hun main

duniya ko de raha hun sabaq husn-o-ishq ka

ifsha har ek raaz kiye ja raha hun main

hoga kabhi to husn-e-haqiqat nazar-nawaz

nazzara-e-majaz kiye ja raha hun main

nakaami-e-umid se ghabra na jae dil

qismat par apni naz kiye ja raha hun main

mahrum rah na jae koi tishna-kaam 'raaz'

arzan sharab-e-raaz kiye ja raha hun main