dil ko KHayal-e-yar ne maKHmur kar diya

dil ko ḳhayāl-e-yār ne maḳhmūr kar diyā

sāġhar ko rañg-e-bāda ne pur-nūr kar diyā

mānūs ho chalā thā tasallī se hāl-e-dil

phir tū ne yaad aa ke ba-dastūr kar diyā

gustāḳh-dastiyoñ kā na thā mujh meñ hausla

lekin hujūm-e-shauq ne majbūr kar diyā

kuchh aisī ho ga.ī hai tere ġham meñ mubtilā

goyā kisī ne jaan ko mas.hūr kar diyā

betābiyoñ se chhup na sakā mājrā-e-dil

āḳhir huzūr-e-yār bhī mazkūr kar diyā

ahl-e-nazar ko bhī nazar aayā na rū-e-yār

yaañ tak hijāb-e-nūr ne mastūr kar diyā

'hasrat' bahut hai martaba-e-āshiqī buland

tujh ko to muft logoñ ne mash.hūr kar diyā

dil ko KHayal-e-yar ne maKHmur kar diya

saghar ko rang-e-baada ne pur-nur kar diya

manus ho chala tha tasalli se haal-e-dil

phir tu ne yaad aa ke ba-dastur kar diya

gustaKH-dastiyon ka na tha mujh mein hausla

lekin hujum-e-shauq ne majbur kar diya

kuchh aisi ho gai hai tere gham mein mubtila

goya kisi ne jaan ko mashur kar diya

betabiyon se chhup na saka majra-e-dil

aaKHir huzur-e-yar bhi mazkur kar diya

ahl-e-nazar ko bhi nazar aaya na ru-e-yar

yan tak hijab-e-nur ne mastur kar diya

'hasrat' bahut hai martaba-e-ashiqi buland

tujh ko to muft logon ne mashhur kar diya