dil ko kya ho gaya KHuda jaane

dil ko kyā ho gayā ḳhudā jaane

kyuuñ hai aisā udaas kyā jaane

apne ġham meñ bhī us ko sarfa hai

na khilā jaane vo na khā jaane

is tajāhul kā kyā Thikānā hai

jaan kar jo na mudda.ā jaane

kah diyā maiñ ne rāz-e-dil apnā

us ko tum jaano yā ḳhudā jaane

kyā ġharaz kyuuñ idhar tavajjoh ho

hāl-e-dil aap kī balā jaane

jānte jānte hī jānegā

mujh meñ kyā hai abhī vo kyā jaane

kyā ham us bad-gumāñ se baat kareñ

jo satā.ish ko bhī gila jaane

tum na pāoge sāda-dil mujh sā

jo taġhāful ko bhī hayā jaane

hai abas jurm-e-ishq par ilzām

jab ḳhatā-vār bhī ḳhatā jaane

nahīñ kotāh dāman-e-ummīd

aage ab dast-e-nā-rasā jaane

jo ho achchhā hazār achchhoñ kā

vaa.iz us but ko tū burā jaane

kī mirī qadr misl-e-shāh-e-dakan

kisī navvāb ne na raajā ne

us se uTThegī kyā musībat-e-ishq

ibtidā ko jo intihā jaane

'dāġh' se kah do ab na ghabrāo

kaam apnā batā huā jaane

dil ko kya ho gaya KHuda jaane

kyun hai aisa udas kya jaane

apne gham mein bhi us ko sarfa hai

na khila jaane wo na kha jaane

is tajahul ka kya Thikana hai

jaan kar jo na muddaa jaane

kah diya main ne raaz-e-dil apna

us ko tum jaano ya KHuda jaane

kya gharaz kyun idhar tawajjoh ho

haal-e-dil aap ki bala jaane

jaante jaante hi jaanega

mujh mein kya hai abhi wo kya jaane

kya hum us bad-guman se baat karen

jo sataish ko bhi gila jaane

tum na paoge sada-dil mujh sa

jo taghaful ko bhi haya jaane

hai abas jurm-e-ishq par ilzam

jab KHata-war bhi KHata jaane

nahin kotah daman-e-ummid

aage ab dast-e-na-rasa jaane

jo ho achchha hazar achchhon ka

waiz us but ko tu bura jaane

ki meri qadr misl-e-shah-e-dakan

kisi nawwab ne na raja ne

us se uTThegi kya musibat-e-ishq

ibtida ko jo intiha jaane

'dagh' se kah do ab na ghabrao

kaam apna bata hua jaane