dil ko laTka liya hai gesu mein

dil ko laTkā liyā hai gesū meñ

jab vo baiTheñ haiñ aa ke pahlū meñ

DabDabāte hī āñkheñ pathrā.ī

kyā hī hasrat bharī thī aañsū meñ

sar-kashī kī jo bū-e-gesū ne

chhup rahā mushk nāf-e-āhū meñ

zindagī bhar kareñge us kī talāsh

chal baseñge isī takābū meñ

dard-e-dil ruuī se na sekvānā

aag hai is taraf ke pahlū meñ

kaun kahtā hai ḳhāl-e-mushkīñ hai

dil hai kisrā kā tāq-e-abrū meñ

bazm meñ un kī jab ga.e haiñ ham

itr bhar bhar diyā hai chullū meñ

bulbuloñ meñ hamārā dil hogā

ruuh hogī guloñ kī ḳhushbū meñ

dil to thā iḳhtiyār se bāhar

ab jigar bhī nahīñ hai qaabū meñ

bahr-e-ġham meñ mareñge Duub ke ham

qabr ik din banegī Taapu meñ

ḳhuuñ rulātī haiñ añkhḌiyāñ terī

ek hī haiñ ye donoñ jaadū meñ

hūreñ passañg kī kareñgī havas

mil vo baiTheñge jis tarāzū meñ

kis ko ġhash aa gayā jo chiḌkoge

kyuuñ bharā hai gulāb chullū meñ

ālam-e-vajd dil ko rahtā hai

mast haiñ na.ara-hā-e-yāhū meñ

ai 'sharaf' jab mazā hai rone kā

nikleñ laḳht-e-jigar bhī aañsū meñ

dil ko laTka liya hai gesu mein

jab wo baiThen hain aa ke pahlu mein

DabDabaate hi aankhen pathrai

kya hi hasrat bhari thi aansu mein

sar-kashi ki jo bu-e-gesu ne

chhup raha mushk naf-e-ahu mein

zindagi bhar karenge us ki talash

chal basenge isi takabu mein

dard-e-dil rui se na sekwana

aag hai is taraf ke pahlu mein

kaun kahta hai KHal-e-mushkin hai

dil hai kisra ka taq-e-abru mein

bazm mein un ki jab gae hain hum

itr bhar bhar diya hai chullu mein

bulbulon mein hamara dil hoga

ruh hogi gulon ki KHushbu mein

dil to tha iKHtiyar se bahar

ab jigar bhi nahin hai qabu mein

bahr-e-gham mein marenge Dub ke hum

qabr ek din banegi Tapu mein

KHun rulati hain ankhDiyan teri

ek hi hain ye donon jadu mein

huren passang ki karengi hawas

mil wo baiThenge jis taraazu mein

kis ko ghash aa gaya jo chiDkoge

kyun bhara hai gulab chullu mein

aalam-e-wajd dil ko rahta hai

mast hain nara-ha-e-yahu mein

ai 'sharaf' jab maza hai rone ka

niklen laKHt-e-jigar bhi aansu mein