dil ko miTa ke dagh-e-tamanna diya mujhe

dil ko miTā ke dāġh-e-tamannā diyā mujhe

ai ishq terī ḳhair ho ye kyā diyā mujhe

mahshar meñ baat bhī na zabāñ se nikal sakī

kyā jhuk ke us nigāh ne samjhā diyā mujhe

maiñ aur ārzū-e-visāl-e-parī-ruḳhāñ

is ishq-e-sāda-lauh ne bahkā diyā mujhe

har baar yaas hijr meñ dil kī huī sharīk

har martaba umiid ne dhokā diyā mujhe

allāh re teġh-e-ishq kī barham-mazāhiyāñ

mere hī ḳhūn-e-shauq meñ nahlā diyā mujhe

ḳhush huuñ ki husn-e-yār ne ḳhud apne haath se

ik dil-fareb dāġh-e-tamannā diyā mujhe

duniyā se kho chukā hai mirā josh-e-intizār

āvāz-e-pā-e-yār ne chauñkā diyā mujhe

da.avā kiyā thā zabt-e-mohabbat kā ai 'jigar'

zālim ne baat baat pe taḌpā diyā mujhe

dil ko miTa ke dagh-e-tamanna diya mujhe

ai ishq teri KHair ho ye kya diya mujhe

mahshar mein baat bhi na zaban se nikal saki

kya jhuk ke us nigah ne samjha diya mujhe

main aur aarzu-e-visal-e-pari-ruKHan

is ishq-e-sada-lauh ne bahka diya mujhe

har bar yas hijr mein dil ki hui sharik

har martaba umid ne dhoka diya mujhe

allah re tegh-e-ishq ki barham-mazahiyan

mere hi KHun-e-shauq mein nahla diya mujhe

KHush hun ki husn-e-yar ne KHud apne hath se

ek dil-fareb dagh-e-tamanna diya mujhe

duniya se kho chuka hai mera josh-e-intizar

aawaz-e-pa-e-yar ne chaunka diya mujhe

dawa kiya tha zabt-e-mohabbat ka ai 'jigar'

zalim ne baat baat pe taDpa diya mujhe