dil ko nasib soz-e-gham-e-gulsitan kahan

dil ko nasīb soz-e-ġham-e-gulsitāñ kahāñ

hotā to aaj hotā ye dard-e-nihāñ kahāñ

zauq-e-bahār hī hai na ḳhauf-e-ḳhizāñ mujhe

gum-sum hai apne haal meñ tab-e-ravāñ kahāñ

jis se guloñ ke zabt kā dāman ho taar taar

hai andalīb terā vo zauq-e-fuġhāñ kahāñ

ho jaa.e ab na ḳhatm fasāna firāq kā

haiñ nūr-e-sub.h raat kī nairañgiyāñ kahāñ

le jā.egī sabā mirā paiġhām tū magar

hogā subuk havā se mizāj-e-garāñ kahāñ

le aa.e toḌ toḌ ke taare falak se ham

lekin nasīb quvvat-e-husn-e-bayāñ kahāñ

'shādāñ' na DhūñDh arsa-e-ġhurbat meñ āsare

is meñ chaman kī arzish-e-arz-o-samāñ kahāñ

dil ko nasib soz-e-gham-e-gulsitan kahan

hota to aaj hota ye dard-e-nihan kahan

zauq-e-bahaar hi hai na KHauf-e-KHizan mujhe

gum-sum hai apne haal mein tab-e-rawan kahan

jis se gulon ke zabt ka daman ho tar tar

hai andalib tera wo zauq-e-fughan kahan

ho jae ab na KHatm fasana firaq ka

hain nur-e-subh raat ki nairangiyan kahan

le jaegi saba mera paigham tu magar

hoga subuk hawa se mizaj-e-garan kahan

le aae toD toD ke tare falak se hum

lekin nasib quwwat-e-husn-e-bayan kahan

'shadan' na DhunDh arsa-e-ghurbat mein aasare

is mein chaman ki arzish-e-arz-o-saman kahan