dil ko paiham dard se do-chaar rahne dijiye

dil ko paiham dard se do-chār rahne dījiye

kuchh to qaa.em ishq kā me.aar rahne dījiye

dil kī duniyā ġham sarāpā ġham kī duniyā kyā kahūñ

kā.enāt-e-dil ko ġham-āsār rahne dījiye

kis taraf jaa.e ġharīb adbār kā maarā huā

is musāfir ko pas-e-dīvār rahne dījiye

aa rahī hai sāz-e-dil ke taar meñ larzish abhī

apnī nazroñ ko sharīk-e-kār rahne dījiye

saarī duniyā ho chukī be-gāna-e-hosh-o-ḳhirad

kam-se-kam 'sādiq' ko to hoshyār rahne dījiye

dil ko paiham dard se do-chaar rahne dijiye

kuchh to qaem ishq ka mear rahne dijiye

dil ki duniya gham sarapa gham ki duniya kya kahun

kaenat-e-dil ko gham-asar rahne dijiye

kis taraf jae gharib adbar ka mara hua

is musafir ko pas-e-diwar rahne dijiye

aa rahi hai saz-e-dil ke tar mein larzish abhi

apni nazron ko sharik-e-kar rahne dijiye

sari duniya ho chuki be-gana-e-hosh-o-KHirad

kam-se-kam 'sadiq' ko to hoshyar rahne dijiye