dil ko paiham wahi andoh-shumari karna

dil ko paiham vahī andoh-shumārī karnā

ek saa.at ko shab o roz pe taarī karnā

ab vo āñkheñ nahīñ miltīñ ki jinheñ aatā thā

ḳhaak se dil jo aTe hoñ unheñ jaarī karnā

maut kī ek alāmat hai agar dekhā jaa.e

ruuh kā chaar anāsir pe savārī karnā

tū kahāñ murġh-e-chaman fikr-e-nasheman meñ paḌā

ki tirā kaam to thā nāla-o-zārī karnā

huuñ maiñ vo lāla-e-sahrā ki huā mere supurd

dasht meñ pairavi-e-bād-e-bahārī karnā

is se pahle ki ye saudā mire sar meñ na rahe

dast-e-qātil ko atā zarbat-e-kārī karnā

ye jo Tapkā hai zabāñ par so karam hai ye tirā

ab rag o pai meñ use jārī-o-sārī karnā

baḳhshā la.al-o-javāhir se sivā tāb-e-suḳhan

ḳhaak ko anjum-e-aflāk pe bhārī karnā

dil ko paiham wahi andoh-shumari karna

ek saat ko shab o roz pe tari karna

ab wo aankhen nahin miltin ki jinhen aata tha

KHak se dil jo aTe hon unhen jari karna

maut ki ek alamat hai agar dekha jae

ruh ka chaar anasir pe sawari karna

tu kahan murgh-e-chaman fikr-e-nasheman mein paDa

ki tera kaam to tha nala-o-zari karna

hun main wo lala-e-sahra ki hua mere supurd

dasht mein pairawi-e-baad-e-bahaari karna

is se pahle ki ye sauda mere sar mein na rahe

dast-e-qatil ko ata zarbat-e-kari karna

ye jo Tapka hai zaban par so karam hai ye tera

ab rag o pai mein use jari-o-sari karna

baKHsha lal-o-jawahir se siwa tab-e-suKHan

KHak ko anjum-e-aflak pe bhaari karna