dil ko rahin-e-band-e-qaba mat kiya karo

dil ko rahīn-e-band-e-qabā mat kiyā karo

hai lā-ilāj is kī davā mat kiyā karo

vaise to iḳhtiyār hai saarā tumheñ magar

jo nāravā hai us ko ravā mat kiyā karo

taufīq to huī nahīñ ḳhairāt kī kabhī

kahte haiñ is galī meñ sadā mat kiyā karo

jo mil ga.e haiñ un kī tavāzo ko chhoḌ kar

jo kho ga.e haiñ un kā patā mat kiyā karo

is kā mo.āmla hai judā vaz.a hī kuchh aur

dil meñ hisāb-e-tañgi-e-jā mat kiyā karo

kuchh aur log haiñ yahāñ is kaam ke liye

vājib hai jo bhī qarz adā mat kiyā karo

jaisā bhī hai vo yaar hai apnā khulā-Dalā

kuchh is liye bhī ḳhauf-e-ḳhudā mat kiyā karo

sach hai ki ham se baat bhī karnā namāz hai

gar ho sake to is ko qazā mat kiyā karo

tum se to hai 'zafar' kā bas itnā mutālba

ḳhud se ise ziyāda judā mat kiyā karo

dil ko rahin-e-band-e-qaba mat kiya karo

hai la-ilaj is ki dawa mat kiya karo

waise to iKHtiyar hai sara tumhein magar

jo narawa hai us ko rawa mat kiya karo

taufiq to hui nahin KHairaat ki kabhi

kahte hain is gali mein sada mat kiya karo

jo mil gae hain un ki tawazo ko chhoD kar

jo kho gae hain un ka pata mat kiya karo

is ka moamla hai juda waza hi kuchh aur

dil mein hisab-e-tangi-e-ja mat kiya karo

kuchh aur log hain yahan is kaam ke liye

wajib hai jo bhi qarz ada mat kiya karo

jaisa bhi hai wo yar hai apna khula-Dala

kuchh is liye bhi KHauf-e-KHuda mat kiya karo

sach hai ki hum se baat bhi karna namaz hai

gar ho sake to is ko qaza mat kiya karo

tum se to hai 'zafar' ka bas itna mutalba

KHud se ise ziyaada juda mat kiya karo