dil ko tarz-e-nigah-e-yar jatate aae

dil ko tarz-e-nigah-e-yār jatāte aa.e

tiir bhī aa.e to be-par kī uḌāte aa.e

bādshāhoñ kā hai darbār dar-e-pīr-e-muġhāñ

saikḌoñ jaate ga.e saikḌoñ aate aa.e

chhup ke bhī aa.e mire ghar to vo darbānoñ ko

apnī pāzeb kī jhankār sunāte aa.e

roz-e-mahshar jo bulā.e ga.e dīvāna-e-zulf

beḌiyāñ pahne hue shor machāte aa.e

kyā kaheñge koī mahshar meñ jo pūchhegā 'amīr'

kyuuñ na bigḌī huī bātoñ ko banāte aa.e

dil ko tarz-e-nigah-e-yar jatate aae

tir bhi aae to be-par ki uDate aae

baadshahon ka hai darbar dar-e-pir-e-mughan

saikDon jate gae saikDon aate aae

chhup ke bhi aae mere ghar to wo darbanon ko

apni pazeb ki jhankar sunate aae

roz-e-mahshar jo bulae gae diwana-e-zulf

beDiyan pahne hue shor machate aae

kya kahenge koi mahshar mein jo puchhega 'amir'

kyun na bigDi hui baaton ko banate aae