dil kushta-e-nazar hai mahrum-e-guftugu hun

dil kushta-e-nazar hai mahrūm-e-guftugū huuñ

samjho mire ishāre maiñ surma-dar-gulū huuñ

muddat se kho gayā huuñ sargarm-e-justujū huuñ

apnā hī mudda.ā huuñ apnī hī aarzū huuñ

sūrat-e-savāl huuñ maiñ pūchho na merā matlab

maiñ apne mudda.ā kī tasvīr hū-ba-hū huuñ

hai dil meñ josh-e-hasrat rukte nahīñ haiñ aañsū

ristī huī surāhī TuuTā huā subū huuñ

zaḳhmoñ se dil kā aalam kyā pūchhte ho kyā hai

gulzār-e-be-ḳhizāñ huuñ duniyā-e-rañg-o-bū huuñ

jalve hijāb-afgan āñkheñ halāk-hasrat

to mahv-e-parda-dārī meñ vaqf-e-justujū huuñ

pāmāl yuuñ huā huuñ pinhāñ hai mujh meñ aalam

ek musht-e-ḳhāk ho kar sahrā-e-ārzū huuñ

ruḳh se kafan haTā do kyā pūchhte haiñ pūchheñ

parde meñ ḳhāmushī ke sargarm-e-guftugū huuñ

kis se 'azīz' rakkhūñ ummīd dostī kī

sarkash hai nafs jab tak apnā hī maiñ adū huuñ

dil kushta-e-nazar hai mahrum-e-guftugu hun

samjho mere ishaare main surma-dar-gulu hun

muddat se kho gaya hun sargarm-e-justuju hun

apna hi muddaa hun apni hi aarzu hun

surat-e-sawal hun main puchho na mera matlab

main apne muddaa ki taswir hu-ba-hu hun

hai dil mein josh-e-hasrat rukte nahin hain aansu

risti hui surahi TuTa hua subu hun

zaKHmon se dil ka aalam kya puchhte ho kya hai

gulzar-e-be-KHizan hun duniya-e-rang-o-bu hun

jalwe hijab-afgan aankhen halak-hasrat

to mahw-e-parda-dari mein waqf-e-justuju hun

pamal yun hua hun pinhan hai mujh mein aalam

ek musht-e-KHak ho kar sahra-e-arzu hun

ruKH se kafan haTa do kya puchhte hain puchhen

parde mein KHamushi ke sargarm-e-guftugu hun

kis se 'aziz' rakkhun ummid dosti ki

sarkash hai nafs jab tak apna hi main adu hun