dil lazzat-e-nigah karam pa ke rah gaya

dil lazzat-e-nigāh karam pā ke rah gayā

kitnā hasīn ḳhvāb nazar aa ke rah gayā

lab tak shikāyat-e-ġham-e-dil lā ke rah gayā

un kī nadāmatoñ pe maiñ sharmā ke rah gayā

mere dil-e-tabāh kā aalam na pūchhiye

ik phuul thā jo khilte hī murjhā ke rah gayā

manzil se duur rahrav-e-manzil thā mutma.in

manzil qarīb aa.ī to ghabrā ke rah gayā

shorīdgī-e-nāla-e-gustāḳh kyā kahūñ

is qalb-e-nāznīñ ko bhī taḌpā ke rah gayā

be-gāna-vār jab vo guzarte chale ga.e

kuchh be-qarār dil mujhe samjhā ke rah gayā

un ke huzūr lab to mukarrar na khul sake

rūdād-e-ġham nigāh se dohrā ke rah gayā

yuuñ ḳhatm dāstān-e-mohabbat huī 'shakīl'

jaise koī hasīn ġhazal gā ke rah gayā

dil lazzat-e-nigah karam pa ke rah gaya

kitna hasin KHwab nazar aa ke rah gaya

lab tak shikayat-e-gham-e-dil la ke rah gaya

un ki nadamaton pe main sharma ke rah gaya

mere dil-e-tabah ka aalam na puchhiye

ek phul tha jo khilte hi murjha ke rah gaya

manzil se dur rahraw-e-manzil tha mutmain

manzil qarib aai to ghabra ke rah gaya

shoridgi-e-nala-e-gustaKH kya kahun

is qalb-e-naznin ko bhi taDpa ke rah gaya

be-gana-war jab wo guzarte chale gae

kuchh be-qarar dil mujhe samjha ke rah gaya

un ke huzur lab to mukarrar na khul sake

rudad-e-gham nigah se dohra ke rah gaya

yun KHatm dastan-e-mohabbat hui 'shakil'

jaise koi hasin ghazal ga ke rah gaya