dil le gai wo zulf-e-rasa kaam kar gai

dil le ga.ī vo zulf-e-rasā kaam kar ga.ī

ka.aba ko Dah ga.ī ye balā kaam kar ga.ī

aayā na yaar maut mirā kaam kar ga.ī

nākām hī rahā maiñ qazā kaam kar ga.ī

zāhid ne bhī namāz ko apnī qazā kiyā

vallāh un butoñ kī adā kaam kar ga.ī

us kī galī meñ ḳhaak hamārī na le chale

apnā kabhī na bād-e-sabā kaam kar ga.ī

zāhid kī aañkh meñ to barahman ke dil meñ hai

tasvīr-e-but bhī nām-e-ḳhudā kaam kar ga.ī

bīmār-e-ishq ko huī sehat visāl se

ai jālīnūs ik ye davā kaam kar ga.ī

naale se apne āh-e-rasā raat baḌh ga.ī

neze se barchhī aur sivā kaam kar ga.ī

vo ab to chheḌ chheḌ ke dete haiñ gāliyāñ

shukr-e-ḳhudā ki apnī duā kaam kar ga.ī

shikva nahīñ hai kuchh malak-ul-maut se mujhe

ik rashk-e-hūr aa ke mirā kaam kar ga.ī

lailā ko ho gayā tirī fariyād kā gumān

ai qais zañg kī bhī sadā kaam kar ga.ī

chhanvā.ī ḳhaak 'mehr'-e-falak-bārgāh ko

chhoTī sī ek chiiz baḌā kaam kar ga.ī

dil le gai wo zulf-e-rasa kaam kar gai

kaba ko Dah gai ye bala kaam kar gai

aaya na yar maut mera kaam kar gai

nakaam hi raha main qaza kaam kar gai

zahid ne bhi namaz ko apni qaza kiya

wallah un buton ki ada kaam kar gai

us ki gali mein KHak hamari na le chale

apna kabhi na baad-e-saba kaam kar gai

zahid ki aankh mein to barahman ke dil mein hai

taswir-e-but bhi nam-e-KHuda kaam kar gai

bimar-e-ishq ko hui sehat visal se

ai jalinus ek ye dawa kaam kar gai

nale se apne aah-e-rasa raat baDh gai

neze se barchhi aur siwa kaam kar gai

wo ab to chheD chheD ke dete hain galiyan

shukr-e-KHuda ki apni dua kaam kar gai

shikwa nahin hai kuchh malak-ul-maut se mujhe

ek rashk-e-hur aa ke mera kaam kar gai

laila ko ho gaya teri fariyaad ka guman

ai qais zang ki bhi sada kaam kar gai

chhanwai KHak 'mehr'-e-falak-bargah ko

chhoTi si ek chiz baDa kaam kar gai