dil mein aate hi KHushi sath hi ek gham aaya

dil meñ aate hī ḳhushī saath hī ik ġham aayā

iid aa.ī to maiñ samjhā ki moharram aayā

ḳhūn-e-dil ho gayā shāyad dam-e-girya jo aaj

evaz-e-ashk lahū āñkhoñ se paiham aayā

nāzukī kahte haiñ us ko ki hazāroñ bal khāte

tā-kamar yaar kā jab gesu-e-pur-ḳham aayā

dil meñ hai jalva-kunāñ chāh-e-zanaḳhdāñ kā ḳhayāl

ain ka.abe meñ nazar chashma-e-zamzam aayā

phir bahār aa.egī phir dāġh-e-junūñ chamkeñge

phir sū-e-burj-e-hamal nayyar-e-āzam aayā

pāk-dāman hai to aisā ki pa.e sidq-kalām

shān-e-ismat meñ tirī sūra-e-mariyam aayā

dī duhā.ī tirī rahmat kī gunahgāroñ ne

lab-e-vā.iz pe jūñhī nām-e-jahannam aayā

dasht-e-ġhurbat meñ ba-juz bekasī-o-yās-o-alam

qabr-e-majnūñ pe na koī pa.e mātam aayā

sher-goī hai vo shai jin kā sila dene ko

ḳhvāb-e-firdausī-e-ḳhush-fikr meñ rustam aayā

phir gayā āñkhoñ meñ us kaan ke motī kā ḳhayāl

gosh-e-gul tak na koī qatra-e-shabnam aayā

jīte-jī hī ke the sab yaar pas-e-marg 'qalaq'

gor par koī na ġham-ḳhvār na hamdam aayā

dil mein aate hi KHushi sath hi ek gham aaya

id aai to main samjha ki moharram aaya

KHun-e-dil ho gaya shayad dam-e-girya jo aaj

ewaz-e-ashk lahu aankhon se paiham aaya

nazuki kahte hain us ko ki hazaron bal khate

ta-kamar yar ka jab gesu-e-pur-KHam aaya

dil mein hai jalwa-kunan chah-e-zanaKHdan ka KHayal

ain kabe mein nazar chashma-e-zamzam aaya

phir bahaar aaegi phir dagh-e-junun chamkenge

phir su-e-burj-e-hamal nayyar-e-azam aaya

pak-daman hai to aisa ki pae sidq-kalam

shan-e-ismat mein teri sura-e-mariyam aaya

di duhai teri rahmat ki gunahgaron ne

lab-e-waiz pe junhi nam-e-jahannam aaya

dasht-e-ghurbat mein ba-juz bekasi-o-yas-o-alam

qabr-e-majnun pe na koi pae matam aaya

sher-goi hai wo shai jin ka sila dene ko

KHwab-e-firdausi-e-KHush-fikr mein rustam aaya

phir gaya aankhon mein us kan ke moti ka KHayal

gosh-e-gul tak na koi qatra-e-shabnam aaya

jite-ji hi ke the sab yar pas-e-marg 'qalaq'

gor par koi na gham-KHwar na hamdam aaya