dil mein hai kya jaaniye kis ka KHayal-e-naqsh-e-pa

dil meñ hai kyā jāniye kis kā ḳhayāl-e-naqsh-e-pā

lag ga.iiñ āñkheñ zamīñ se jo misāl-e-naqsh-e-pā

tāqat uThne kī nahīñ hai tan meñ zo.af-e-ishq se

haal apnā in dinoñ hai hasb-e-hāl-e-naqsh-e-pā

safha-e-sahrā meñ hai ḳhār-e-muġhīlāñ juuñ alif

ḳhuub ai majnūñ tirī aa.ī hai fāl-e-naqsh-e-pā

yak-qalam ai gul-badan rashk-e-gul-e-qālīñ hai dekh

farsh-e-ḳhākistar hai terā ye nihāl-e-naqsh-e-pā

dur-fishānī se tirī rahtā hai ham-chashm-e-sadaf

thā yahī ai chashm-e-tar tujh se savāl-e-naqsh-e-pā

TikTikī yaañ tak bañdhī haigī ki ḳhāl-e-mardumak

ban gayā is shoḳh kā har vaj.h ḳhāl-e-naqsh-e-pā

sūjhtā hai haath se is nā-tavānī ke 'nasīr'

rafta rafta hoñge ik din pā.emāl-e-naqsh-e-pā

dil mein hai kya jaaniye kis ka KHayal-e-naqsh-e-pa

lag gain aankhen zamin se jo misal-e-naqsh-e-pa

taqat uThne ki nahin hai tan mein zoaf-e-ishq se

haal apna in dinon hai hasb-e-haal-e-naqsh-e-pa

safha-e-sahra mein hai KHar-e-mughilan jun alif

KHub ai majnun teri aai hai fal-e-naqsh-e-pa

yak-qalam ai gul-badan rashk-e-gul-e-qalin hai dekh

farsh-e-KHakistar hai tera ye nihaal-e-naqsh-e-pa

dur-fishani se teri rahta hai ham-chashm-e-sadaf

tha yahi ai chashm-e-tar tujh se sawal-e-naqsh-e-pa

TikTiki yan tak bandhi haigi ki KHal-e-mardumak

ban gaya is shoKH ka har wajh KHal-e-naqsh-e-pa

sujhta hai hath se is na-tawani ke 'nasir'

rafta rafta honge ek din paemal-e-naqsh-e-pa