dil mein jamal-e-yar ki tanwir dekhiye

dil meñ jamāl-e-yār kī tanvīr dekhiye

is aa.ine meñ sūrat-e-tasvīr dekhiye

rusvā tamām ḳhalq meñ hoñ yā zalīl hoñ

kyā din dikhā.e nāla-e-shab-gīr dekhiye

banda kahāñ janāb kahāñ ye makāñ kahāñ

maqsūm dekhiye mirī taqdīr dekhiye

ab ke jo haul-e-dil ho to ye kījiye ilaaj

siine pe rakh ke yaar ke tasvīr dekhiye

darvāza kholiye mujhe ghar meñ bulā.iye

kab se hilā rahā huuñ maiñ zanjīr dekhiye

hai qasr-e-tan meñ ra.asha-e-pīrī se zalzala

girtī hai koī dam meñ ye ta.amīr dekhiye

kūche meñ aap ke mire miTTī ḳharāb hai

barbād ho rahī hai ye iksīr dekhiye

jallād se kaho ki na pūchhe vasiyyateñ

hotī hai mere qatl meñ tāḳhīr dekhiye

mahshar meñ bhī huā na mirā un kā faisla

tūl-e-kalām-o-vus.at-e-taqrīr dekhiye

dil aap kā to kyā hai abhī arsh tak hile

manzūr ho to aah kī tāsīr dekhiye

bīmār ho ke bosa-e-unnāb-e-lab liyā

mujh ko na dekhiye mirī tadbīr dekhiye

jab bosa māñgtā huuñ maiñ karte ho hujjateñ

itne se muñh pe aur ye taqrīr dekhiye

piirī meñ ham ko ishq-e-mizha kā ḳhayāl hai

hotī hai ye kamān hadaf tiir dekhiye

manzūr imtihān hai baḳhshish kā aap ke

kartā huuñ kis umiid pe taqsīr dekhiye

dil mein jamal-e-yar ki tanwir dekhiye

is aaine mein surat-e-taswir dekhiye

ruswa tamam KHalq mein hon ya zalil hon

kya din dikhae nala-e-shab-gir dekhiye

banda kahan janab kahan ye makan kahan

maqsum dekhiye meri taqdir dekhiye

ab ke jo haul-e-dil ho to ye kijiye ilaj

sine pe rakh ke yar ke taswir dekhiye

darwaza kholiye mujhe ghar mein bulaiye

kab se hila raha hun main zanjir dekhiye

hai qasr-e-tan mein rasha-e-piri se zalzala

girti hai koi dam mein ye tamir dekhiye

kuche mein aap ke mere miTTi KHarab hai

barbaad ho rahi hai ye iksir dekhiye

jallad se kaho ki na puchhe wasiyyaten

hoti hai mere qatl mein taKHir dekhiye

mahshar mein bhi hua na mera un ka faisla

tul-e-kalam-o-wusat-e-taqrir dekhiye

dil aap ka to kya hai abhi arsh tak hile

manzur ho to aah ki tasir dekhiye

bimar ho ke bosa-e-unnab-e-lab liya

mujh ko na dekhiye meri tadbir dekhiye

jab bosa mangta hun main karte ho hujjaten

itne se munh pe aur ye taqrir dekhiye

piri mein hum ko ishq-e-mizha ka KHayal hai

hoti hai ye kaman hadaf tir dekhiye

manzur imtihan hai baKHshish ka aap ke

karta hun kis umid pe taqsir dekhiye